吳浩康女友床樣禁人睇
公開與鍾舒漫蜜運的吳浩康，早前全男班拍英皇電影《救火英雄》，直言冇同女人相處咁煩，卻又不介意跟女友情侶檔拍戲，但就抗拒對方拍床戲：「唔想佢床上嗰面畀人睇！」更聲稱私下婚前冇「床戲」。
吳浩康（Deep）早前夥影帝謝霆鋒、任達華（華哥）及余文樂等拍英皇電影《救火英雄》，飾演兩粒花消防員的他慶幸「執到支好籌」，辛苦指數是對手們的三分一：「唔係幸災樂禍，但真係覺得自己幾幸福，我最辛苦係講對白，要好急、好清楚又要有情緒，喺拍攝現場自不然做到，但喺錄音室冇嗰種感覺難啲，結果配咗兩日畀導演鬧。」當時偏肥的Deep直言受華哥影響，身形清減不少：「有次工作人員畀包薯片華哥，華哥二話不說拒絕咗，佢話鍾意食呢啲嘢，但為keep身形十幾廿年冇食，所以去到呢個年紀都好有型。」Deep更自信地稱九個月來早晚跑步加健身，六點後節食，在續集騷肌絕對冇問題。
婚前冇曳曳
提到片場陽剛味十足，Deep直言好開心：「男人之間嘅相處有時冇同女人咁煩。（你女人煩？）唔講咁多，要交代嘅都講咗，希望焦點放番喺工作。」但他指不介意與女友鍾舒漫（Sherman）情侶檔拍戲，並笑問：「其實有冇人想睇？現實生活都係咁睇嚟做乜！（會否介意拍床戲？）呢個睇公司。（將私事放上銀幕都得？）第一，我哋私事暫時婚前係冇床戲，第二，我自己喺呢方面幾介意，即使佢對手係我都唔係太想，我唔會想將佢床上嗰一面展示喺大銀幕畀人睇。」
拍戲有要求
近年主力在電影方面發展的Deep，自言每次拍戲都很緊張：「我嘅壓力係對自身嘅要求、配唔配合到導演、可唔可以同其他對手互動。以前驚自己唔夠，但依家人大咗發現係我有所追求，希望可以同對手有健康嘅交流、節奏順暢。」Deep認為今次與霆鋒拍得最順暢，又大讚對方「勁咗」、演技也穩定了。
髮型：Moe @ MM IL COLPO
化妝：Keikei Ng
文：影視組
攝：吳文聰