黃芷晴創意爆棚 新年自製桃花運
逐步邁向夢想的黃日華愛女黃芷晴，新一年創意爆棚為自家首飾品牌設計一系列新年作品，更自爆希望靠作品桃花運不斷，向來熱愛小手工的華哥，今次更助女兒一臂之力！
讀平面設計出身的黃芷晴，除熱愛演戲外，更學以致用醉心首飾設計，最愛Sweet Vintage的她一步一步向夢想進發，早前成立自家首飾品牌「Oh My Deer」後，不時親自設計及落手整首飾，近日趁住新年，創意爆發的芷晴又有新搞作，設計了一系列與「馬」有關的新年作品，她說：「因為今年係馬年，加上自己屬馬，所以作品全部都同馬有關。我特登有某啲作品加咗桃花落去，希望馬仔馬女今年多啲桃花！」為增加品牌的知名度，芷晴除將作品放去商店寄賣及搞網購外，更將在月底臨近新年時連擺七日攤檔賣首飾，提到父親黃日華可有幫手，芷晴笑言：「Daddy對小手工都有興趣，不過滴膠嗰啲佢唔識，惟有幫我剪啲馬形貼紙。」問到品牌收益歸誰，芷晴笑言：「希望封一封大利是畀Daddy媽咪，再儲多啲錢開實體店，始終依家得online shop，好少渠道畀人認識。」
先學演戲後登台
至於面對香港電視的種種新聞，芷晴表示不擔心前途：「我只係擔心同Daddy嘅作品冇得出街，因為對我哋嚟講係難得嘅回憶！」她又表示：「Daddy叫我做好目前工作先，唔好諗鋪唔鋪後路。佢都成日叫我跟佢返大陸登台，但我諗都係一步一步嚟，學好演戲先。」
文：專案組