子丹「偷桃」施襲 發哥鬧百厭
「宇宙最強」甄子丹於新片演孫悟空，坦言不擔心外間把他與周星馳演繹的孫悟空作比較，因兩者路向不同，更自爆與「玉帝」周潤發演對手戲時，突然加插一幕猴子偷桃，令發哥措手不及，並拍其手笑罵百厭，子丹更抵死地指沒有出盡力，但就要回憶手感如何。
擅長動作戲的甄子丹，雖然從影多年來受傷無數，但仍然咬住牙關捱過去，最近他參演星皓巨製《西遊記之大鬧天宮》，飾演經典人物孫悟空，面對每天花上5小時特技化妝，再加上經常要屈膝演戲，令子丹叫苦連天，幸而過程間能夠與周潤發、郭富城、陳慧琳等經驗演員合作及互動，對他來說總算有點安慰。
為配合戲中特技，身兼動作導演及演員的子丹，着老闆花費數十萬購入提升空中飛行動作的道具，更指城城對這個「新玩具」大感新鮮，他謂：「佢第一次玩已經好醒係咁轉嚟轉去，發哥就好知鏡頭要啲咩，大家喺互動過程要求更多（過程有冇受傷？）傷都係來自多年來拍戲勞損。」雖然受傷次數頻密，但子丹表示暫冇意轉型，更謂：「依家做到就做，仲有好多創作空間想試，除非有一日冇咩諗法，先轉做監製，呢兩年仲有團火。」
唔怕同星爺比較
子丹笑指起初為如何演繹馬騮瀟灑、自由狀態絞盡腦汁，沒想到一次於家中，看見囝囝跳來跳去便找到答案，後來到片場後加以發揮，還向發哥偷襲，他謂：「要好free狀態先係隻馬騮，第一次同發哥做戲，冇排練就去撩佢，猴子偷桃嗰種，佢都即刻拍我隻手，cut機後就話我百厭，我答佢係孫悟空百厭（真係掂到？）冇出盡力，驚佢接唔住，留少少力，係點就等我回憶下手感先，（發哥有咩反應？）咪問我搞咩，唔驚發嫂鬧咩！」
對於周星馳多年前也演過同類角色，問到會否擔心外間拿二人作比較 ？子丹更謂：「呢10年8年孫悟空演繹方法幾顛覆，希望可以還原o靚仔時純真，星仔就都市人啲，我就動物化啲。」
攝：司徒國榮
文：影視組