秋生下通緝令 要志偉蒲頭
黃秋生日前被拒進入演藝人協會會址，與秘書長陳芷菁各執一詞。秋生昨日在微博透露「演協事件已溝通」，似是有新進展。但他稱至今仍聯絡不上前會長曾志偉，笑言要通緝對方，呼籲大家協助找志偉出來。
「演協內訌」又有新進展，秋生昨日透過微博表示「演協事件已溝通」、「多謝大家這兩天為十萬火急做的宣傳」，似有明朗化迹象。秋生透過電話表示已聯絡芷菁：「氣氛OK啦，主要講番究竟入唔入會，唔可以話乜都唔知，要搞好咗啲問題先。主要了解我哋睇法，等佢喺個會上講番，有個共識。如果再係咁，唔搞嘞，好煩。」問他有否聯絡前會長志偉？他說：「打過畀佢，冇人聽。希望傳媒幫手搵志偉，我搵唔到，有種無力感，同佢好似捉迷藏咁。（主要係佢現身？）梗係，幫我搵吓佢，通緝佢。」他又在Facebook爆粗，指有媒體扭曲視線，將「演協內訌」扯到「奪權」，他說：「廢話，會都未入，講到咁長遠。唔該還原問題係點入會。」
冇講「留我都唔做」
芷菁回覆記者時亦稱「已與黃秋生達成共識」，並指秘書處已陸續安排其班底入會辦手續，理事會亦正商議大選日期，並澄清未有講過「留我都唔做」。問到若秋生當會長會否請辭？她則稱現在最急切處理大選會務，其個人職務問題待過後才考慮。
莊思敏埋怨欠靈活
當日與秋生一齊被拒進入演協會址的莊思敏稱正在了解入會手續：「希望盡快解決，依家狀態好open。秋生哥有問大家意願，所有人都希望繼續。」並透露他們組織了名為「醬油會」的group chat訴心聲，又指芷菁處理手法欠缺靈活。而芷菁好友鄧梓峰昨日出席活動時稱，相信芷菁出於確保要入會才選會長是「執正嚟做」，他說：「相信入會都要時間去處理，如果秋生早少少入會可能避免到件事，不過佢申請入會實得啦。（芷菁一權獨大？）誤會啫。識佢咁多年，佢做事執到正依規矩做嘢，一絲不苟係佢性格。」
另外，秋生日前以神秘嘉賓身份亮相內地「年度秀」節目，即席獻技吹口琴，又教大家朗誦，並讚同場的陳法拉有演出天分。
文：影視組