梁珊：其他人係外人
演協會籍組組長梁珊被指曾開口趕走秋生等人，她昨於電話中指秋生到場時只與芷菁溝通，自己沒有插嘴，是秋生提出買咖啡而離開。不過她直言：「我哋閂埋門自己屋企事，其他人係外人嚟。」
梁珊透露上月二十日已提醒秋生要填表格續會：「佢之前係會員，只要佢填番表格續會，就可以即日生效。我哋流會都係畀機會佢填表，既然咁熱心，點解唔填呢？」若秋生改變初衷入會做會員，會否難以與他共事？梁珊謂：「我對事唔對人，我只係按章程做嘢！（退會？）做乜為咗佢退出？」如果芷菁出選會長，會否投她一票？梁珊笑言：「唔好講如果，可能我投自己呢！」