惠英紅蝕晒喊爆腳傷冇得醫
藝人惠英紅昨腳踏「石膏鞋」於太子出席其有線新節目《惠英紅的快樂傳說》舉辦的盆菜宴，好友錢小豪、鍾慧冰及吳耀漢亦有份到場支持。其後於受訪時問到為何其左腳打上石膏？她即大爆左腳腳筋「蝕淨好少」：「係長期受傷積落的舊患，可能因為早前我為咗準備新戲而狂練跑步引發出嚟，搞到早幾日行唔到路。之後醫生話我左腳啲筋蝕淨好少，所以要打石膏三個禮拜。（會否停工？）唔會，過幾日就要返大陸做嘢，依家還緊債（意指舊患發作）！」
鹿筋湯以形補形
之後她又自爆右腳都「重傷」：「膝蓋有瘀血，十字韌帶亦撕裂咗。」她坦言曾為雙腳傷勢痛哭，因為醫生指「冇得醫」：「醫生話冇藥食，冇得醫，只可以等啲筋生番出嚟！我喊到『死死吓』呀！」但她又補充打石膏後情況好轉，現時更日日飲其妹炮製的愛心鹿筋湯補身。
此外，談到邵逸夫爵士的追思會一事，她稱早已準備送花牌到場，如屆時自己在港必定會出席。至於身旁邵氏出身的錢小豪亦稱會到場。
文：影視組