田蕊妮踩黃翠如平胸冇人吼
藝人黃翠如被指姣嗲攻陷蕭正楠，昨日她為劇集《舌劍上的公堂》宣傳時直言每天只睡得三小時，根本沒時間搞緋聞；田蕊妮更口快快踢爆蕭正楠蜜運中，所以唔會睇中平平無奇的黃翠如；蕭正楠就稱得啖笑，其緋聞女友何傲芝直情甚麼都不聽便說沒回應。
視后田蕊妮、郭晉安、黃翠如、許亦妮、鄭俊弘等昨日到深水埗為《舌》造勢，對於跟蕭正楠傳緋聞，翠如笑說多謝給予她封面：「每日瞓得三個鐘，邊有力搞緋聞，當宣傳都好，我係對個姣字有啲介懷，因為我無咩女性元素。（怕唔怕見到何傲芝尷尬？）唔會，人哋嘅事我無必要八卦。」翠如笑言拍畢就會離港多月，屆時就沒事。問到是否返洪永城身邊？翠如即附和道：「係啊，同佢傳最安全，最多我唔嫌棄佢啦。」
蕭正楠接受電話訪問時表示得啖笑，何傲芝更是未聽來龍去脈就斷言不作回應，阿田聽後大表驚訝，惟不慎口快快說蕭正楠一直在蜜運中，最後只好補鑊道：「成日見佢個樣甜絲絲，以為佢有囉，但翠如無身材，平平無奇，蕭正楠唔鍾意呀，翠如係要好識貨嘅男人先會要。」
另外，早前許亦妮因戲院內偷拍自己演的電影闖禍，她強調真的不知道，父母也有致電責怪她：「佢哋好循規蹈矩，問我點解咁唔小心，我見到自己太開心，想紀念下，我以後唔會再犯。」
安仔提早收爐過肥年
安仔透露可過肥年並提早收爐，欲挑戰首次一家四口去東南亞旅行：「從未試過都好驚o架，囡囡真係好鍾意食飛機餐，上次仲食到嘔添，所以要好好留意住唔好畀佢食咁多嘢。」
文：影視組