琦琦珍藏老公相思豆
任達華（華哥）和琦琦是圈中數一數二的模範夫妻，自從誕下女兒任晴佳，變成三口模範之家。華哥是一個很有情趣的男人，令身邊人開心視為己任，他經常會送禮物給妻女，除了鑽石及物業這些俗套之物，難得他還別出心裁送上一顆相思豆，令琦琦珍而重之，視之為瑰寶，與珠寶一同收藏。
華哥經常掛在嘴邊的一句說話：「應該嘅！」「買禮物送畀老婆同個女，應該嘅！」「氹囡囡開心應該嘅！」路人甲乙丙聽起來也感覺窩心，何況是華哥口中應該愛錫的琦琦和小晴佳！
華哥形容買禮物送給妻女是他的最大興趣，訪問當天，他說琦琦早上看見他身上穿着的牛仔衫，讚款式很好看，華哥便趁未埋位工作的空檔，跑去那間時裝店多挑了一件女裝牛仔衫送給琦琦，這就是他的興趣。好奇問：「你哋鍾意着情侶裝嗎？」他笑着搖頭說：「唔係，係分開着，少少禮物唔使一齊着咁高調，買嘢畀老婆應該嘅！琦琦都送咗件黑色羽絨畀我，我就快要去北京做嘢。」
互送畫作家庭樂
「我哋好簡單，唔複雜，互相送禮物，禮物唔一定要花錢買，個女就成日畫畫畀我，收到好開心o架，我又會畫畫用WhatsApp傳畀佢，呢啲係我哋嘅家庭樂趣。有時去到邊度，都會影張相傳畀佢睇，幾得意。」他認為科技將他與女兒拉近，但相信科技亦會將人與人之間拉遠，所以要人控制科技，而非科技控制人，他說：「用手機畫畫就好，唔好用嚟打遊戲機。」
華哥送給琦琦最經典的禮物，必定是「糖」（鑽石）和「磚頭」（物業），曾經送過十全十美的十卡鑽石戒指，以及在世界各地購買物業，然後寫上琦琦的名字送給太太，琦琦說：「其實我好怕收銀行信，叫佢唔好將啲『磚頭』寫我名，叫佢寫個女名，但個女太細又唔得，老公就話唔使我煩，佢會自己搞。」她續說：「佢乜嘢都會送畀我，好似收過繡咗我名嘅毛巾，但我收過一份好有趣嘅禮物，係一粒豆，有日老公送咗粒相思豆畀我，覺得好好笑，一直放喺珠寶盒裏面。」
女兒是上世情人
琦琦說女兒也經常送她禮物，聖誕節便收到女兒用紙做的東南西北小玩意，打開一看，裏面全寫着送給父母愛的留言，琦琦看後也很感動，因為自己擁有一個心地好的女兒，她說：「我媽咪成日講生咗我，就好似中咗頭獎咁，話我好孝順；我有個心地好嘅女，都好感恩。」
華哥認為沒有做父親的不錫女兒，認為女兒是自己上一世的情人，他說：「如果你係廚師，可以整一餐好味嘅菜式畀女兒食；如果你係雕刻師，親手做一個雕刻送畀自己個女，呢啲都唔使用太多錢，但呢份關懷個女係感覺到。」廿四孝父親，還有甚麼做得不足之處？他說：「囡囡唔理解拍戲係乜，唔明點解爹哋要走嚟走去，成日問：『可唔可以唔返工？放假咪得囉！』」
常「在」晴佳左右
因為拍戲關係，他經常不在港，不在女兒身邊的他，卻又經常「出現」在女兒左右，他說：「我哋成日互傳訊息聯絡，（一日幾多次？）十幾次，有次喺大陸，我畫佢個樣嘅公仔，公仔係拎住個手袋仔，傳畀佢睇，佢好開心；去西安拍戲，又會影張街頭相傳畀佢；去馬來西亞拍廣告，一落機又會傳張相畀佢；喺台灣宣傳鬼片，我會同佢講嗰部係恐怖片，好想同佢分享自己的一點一滴，我唔喺佢身邊，但好近。」他續說：「我成日話畀佢知我做乜，所以我哋唔會有代溝。」
唯一口味夾不來
在琦琦眼中，收到老公的禮物，代表收到他送上的關愛，感覺很是浪漫，琦琦大讚：「佢係好好嘅男人，唔只對我大方，對我嘅朋友都好大方，視我屋企人為佢屋企人看待，（絕世好男人？）可以咁講，佢係好男友，好朋友，好老公，又好似哥哥。」他倆結婚十五年，感情有增無減，每日有談不完的話題，琦琦說與任達華有很多共同的喜好，同樣喜歡時裝、喜愛攝影、愛出外旅行及研究裝修家居，笑言唯一夾不來的是飲食口味。問到華哥的唯一缺點，是否不肯戒煙？琦琦笑說：「係我唔使佢戒，佢唯一唔健康係食煙同飲咖啡，我覺得唔係問題，佢只係一日食幾支，拍戲通宵咁辛苦，如果改食薯片咪仲唔好？人點可能做到百分百咁健康！」
夫妻檔浪漫演繹
華哥和琦琦生活上好合拍，工作上亦是好拍檔，原因他們都愛扮靚，熱愛時裝，除結伴出席時尚活動，又合作拍廣告，早前他們便做回老本行，一起擔任模特兒示範英國品牌Daks秋冬裝，演繹英國的浪漫火車之旅情懷。
撰文：Tracy Leung
攝影：黎志輝