AliceB.喊足3個月 復出還債
「第四代Canon甜心」、英泰混血女模Alice B.去年經歷情變、母親病情惡化、財政出現問題等等，可謂禍不單行。潦倒的她更淪落至借錢度日，債務至今尚未還清。在窮得沒錢開飯時，還幸Alice B.獲開沙律店的前前男友「打救」，任她吃免費沙律，才能渡過難關。如今她終於走出陰霾，全面復工，努力搵錢還債！
為母藥費用盡積蓄
其實前年我經歷咗好大嘅情緒起伏，除咗因為我媽媽嘅病情好反覆，我同前男友成日有拗撬，工作壓力又大，總之情緒好唔穩定。嗰陣我日日以淚洗面，連續三個月晚晚都喺屋企喊。我覺得自己一定要好好休息一陣，唔可以再工作。之後，我媽媽又嚟咗香港住三個月，一來嚟睇醫生，二來方便我照顧佢。所以，我索性向公司請咗幾個月大假，等我好好照顧媽咪兼休息。
銀行戶口1蚊都冇
不過，最大問題係我手停口停，唔接job就冇錢，我只能夠靠我嘅積蓄度日。但係唔做嘢半年，又要畀媽媽嘅醫藥費，真係用盡我所有積蓄！我之前個戶口真係一蚊都冇得剩！喺我人生最窮困、最坎坷嘅時候，就會睇得出邊個係你真正嘅朋友，邊個唔係。真係好多謝我嘅前前男友，其實佢係開一間沙律舖頭嘅，喺我同佢拍拖嗰陣，我免費幫佢影咗個廣告。當佢知道我好窮嘅時候，佢就同我講「你隨時都可以嚟我間舖頭免費食沙律，因為你之前免費幫我拍廣告，呢個就係我畀番你嘅酬勞，係你應得嘅。」真係好多謝佢，佢咁講唔單止令我冇咁難受，而且仲要喺我連三餐都解決唔到嘅時候幫我一把。
感激舊愛相助
雖然話冇錢開飯我可以去攞沙律食，但係水、電、煤、租等等，每個月點都要畀。走投無路之下，我開始問我身邊嘅朋友借錢。起初我每個朋友借少少，但係後來發現咁樣唔係辦法。最後決定問我前男友借一大筆錢，還晒畀其他人，我再慢慢逐啲逐啲還番畀佢。無可否認，我前男友喺我嘅財政上真係幫咗我好多，亦都好多謝佢畀錢我媽媽去睇醫生，喺我媽媽嚟香港期間，好多支出都係由佢畀，但佢畀唔到精神上嘅支援我。其實好多時我只係想搵佢傾偈，講吓我有咩煩惱，我只係想佢捉住我隻手，同我講冇事嘅。不過每次我搵親佢，佢都會同我講「你癲咗」，然後就畀錢我去睇心理醫生，我想要嘅真係唔係呢啲！
其實我個人並唔鍾意錢，但係我接受唔到要我屋企人捱餓，如果唔係要照顧我媽媽，我都唔會問人借咁多錢。但為咗屋企人，我覺得係值得嘅，為咗佢哋，要我做乜都得。
呢段日子，我好認真咁諗過我嘅將來。做模特兒搵錢係快，但唔長久，你唔可以保證你會紅一世。我有諗過轉工，仲考慮緊做老師，因為我好鍾意小朋友，亦好鍾意表演、畫畫同寫作，不過我讀完高中已經出嚟做模特兒，如果真係要轉行，首先要完成我嘅大學學位。屋企人都好支持，加上我爸爸係大學教授，佢依家幫我搵有咩學科適合我讀，真係好好。不過我短期內應該都唔會轉行住，因為我首先一定要努力搵錢，還晒我啲欠債先。
小貓咪作慰藉
在Alice失意之時，她常躲在家中，一個人沉思或寫日記，把心中的抑鬱統統寫出來。在這精神崩潰的時刻，她坦言幸有家中的小貓咪Mia相伴，為她減輕痛苦。「之前我做嘢，喺studio見到Mia，嗰陣佢仲係一隻BB。我真係好鍾意佢，所以就問可唔可以送咗畀我。帶咗佢返屋企之後，佢成日喺屋企都跟住我出出入入，真係畀到好大嘅心靈慰藉我。我當正佢係我嘅囡囡！」
後記：
重新出發的Alice，心情明顯比從前開朗，更願意打開心扉，說出自己所受的創傷。問到她走出失戀傷痛的原因，是否因為有新戀情的滋潤？她只甜絲絲地笑說不能透露，答案不言而喻。
口述：Alice B.
筆錄：龔凱欣
攝影：黎志輝
服裝：bread n butter