郭晉安遊泰驚喜遇「打仗」
田蕊妮任女主角的無綫劇《舌劍上的公堂》昨日到尖沙咀宣傳，阿田因另有工作缺席，郭晉安、鄭俊弘（Fred）、王君馨等落力宣傳。
安仔透露聖誕與太太及子女外遊期間遇上「打仗」：「我哋去布吉玩，有晚酒店出面突然砰砰聲，我以為打仗，叫老婆快啲執嘢，後來先知係放煙花，咁大個人未試過咁近睇煙花，好浪漫，不過仔女因為玩到好攰全程瞓覺，得番我同老婆慢慢欣賞。」他又想新劇收視有好成績：「2013年第一餐慶功飯係《老表，你好嘢！》，我想2014年第一餐飯都係我嘅！」
獲fans撐場的Fred大讚fans乖及有秩序，又稱稍後將全情投入唱片工作：「拍埋新劇《牛頭愛搭馬嘴》會停接劇，近日我都有睇樂壇頒獎禮，好想出席。（想攞獎？）就算坐台下感受氣氛都好開心。」