余文樂發燒禁離港 聲控谷戲
余文樂昨日原定到南京為英皇新片《救火英雄》「跑碼頭」謝票，想不到卻突然發高燒未能離境，惟有交由導演郭子健獨挑大樑。病榻中的余文樂錄製聲帶，交由工作人員帶往當地播放，向粉絲致歉。拍檔謝霆鋒得悉樂仔情況，即謂：「大家一齊出生入死，佢一直都好落力，希望佢早日康復啦！」
由霆鋒及余文樂主演的《救》片，上映以來票房與口碑均不俗，單是香港方面已衝破千萬票房大關，加上老闆楊受成曾許諾「達標分紅」，難怪兩位男主角笑言會落力跑數。原定昨日兵分三路宣傳，包括霆鋒率陳偉霆、衛詩雅及吳浩康到廣州謝票、任達華偕洛詩飛抵武漢與粉絲互動，以及余文樂與郭導亮相南京跑戲院，想不到前晚余文樂突告發燒，被迫取消行程，他隨即於社交網站上載照片及留言，對未能現身南京大表歉意。
發冷全身無力
余文樂昨透過助手梁小姐回覆記者查詢：「樂仔喺北京宣傳返港已經有啲唔舒服，點知昨晚（前晚）開始發燒，本來諗住食啲藥頂住，但之後仲有其他工作，唔想影響到，咪叫佢去睇醫生囉，點知醫生話佢燒到百幾度，根本唔可以搭飛機，仲畀咗幾日藥佢『傍身』，叫佢一定要多啲休息。」
一向活躍的余文樂因病被困家中，連續兩日於微博報告近況，繼大前日留言：「發冷…全身無力…我想我係病了。」前日更「升級」，上載擁着兩隻愛犬的照片寫道：「發高燒甚麼地方都不能去，幸好有你兩位陪我。」認真慘情。
導演獨力孭飛
由於余文樂發燒未能出境，南京站宣傳重責交由郭導孭飛，而余文樂則預先錄製聲帶，於現場播放向戲迷致歉，難得現場觀眾依舊反應熱烈。郭導接受長途電話訪問表示：「大家都好鍾意套戲，粉絲又好體諒樂仔嘅情況，所以我冇壓力。（香港票房過千萬喎。）我1月1日啱啱過完生日，呢個消息算係最好嘅禮物，但希望再好啲添。」當問到老闆楊生有否提過開續集？郭導坦承：「有講過，但要睇大家嘅檔期囉。」
至於身在廣州的霆鋒聞得樂仔抱恙，即替對方打氣：「大家係好兄弟，拍呢部戲好似一齊出生入死過，佢之前都好落力做宣傳，希望佢早日康復啦！」
文：影視組