徐子珊鄉妹出城見世面

愛表演 唔知醜

我好多謝得到無綫厚愛，港姐御任後，我有機會去參演電視劇，飾演唔同角色，其實我從來冇諗過入行做演員，亦冇屋企人做呢一行，我只係自小鍾意睇戲，表演慾超強，可以話唔知醜！但當我接觸演戲後，先發覺係另一回事，唔係想像中咁簡單，頭一、兩年我根本唔enjoy拍戲，根本講唔上熱愛，直至接拍完電視劇《女人唔易做》，先開始有嗰份passion，仲愈來愈enjoy拍戲。

第一部戲即攞獎

徐子珊當選2004年港姐四料冠軍，從此開展美麗星途，左為亞軍朱慧敏，右為季軍符思思。

我係鄉下妹，要出城見識。

之後我好開心可以跳出公仔箱，有機會嘗試拍電影《跟蹤》，好多謝導演杜琪峯畀呢個機會我，冇諗過自己第一部戲可以做女主角之餘，仲可以攞埋香港電影導演協會「最佳新人獎」金獎，同埋第27屆香港電影金像獎「最佳新演員獎」！當時自己都唔敢相信，好似發夢一樣，演技得到肯定，當然係開心，亦為我打咗支強心針。講真，我唔敢驕傲，因為我覺得呢個獎係我事業嘅新開始，我同自己講，日後要做得更好，要珍惜每個機會！

Fans多年來的支持，是徐子珊一大原動力。	徐子珊不介意飾演醜角與奸角，認為演員不應被定型。	子珊前年在萬千星輝頒獎典禮勇奪「我最喜愛的電視女角色」，旁為同時獲獎的馬國明。
徐子珊視音樂舞台劇為終極夢想，望能實踐圓夢。

演毒后 入民心

其實你問我鍾意拍電視定電影？兩樣我都好鍾意，基本上製作規模好唔同，拍電視較為長時間，而且日日都可以唔同人，好多時都自己顧自己，要有獨立性，適應力要高，相反拍電影就好似公主咁，好多人服侍，而且拍嚟拍去都係呢班人，各有各好玩嘅地方同滿足感。我暫時都會影、視兩邊走，因為兩邊都係我最愛，好難要我取捨，因為我有選擇困難症。

獲認同錦上添花

前年我接拍電視劇《雷霆掃毒》，我飾演一個身世可憐嘅酒吧拳手，最終走上販毒不歸路，呢個角色好深入民心，亦係我入行以來飾演過最悲慘嘅角色，對我係挑戰同埋突破。雖然大家好希望我憑呢套劇攞視后，不過最終落敗（奪得「我最喜愛的電視女角色」），我冇唔開心，因為好老套咁講，得到大家嘅認同，我覺得比攞獎有更大成功感。我拍戲，係我鍾意演戲，而唔係為攞獎，當然有獎攞，我唔會抗拒，但獎項對我嚟講只係錦上添花。

想唔想拍一部屬於自己嘅代表作？真係好難講，順其自然，而且我亦從未諗過去荷里活發展，又或者北上賺人仔，總之一切隨緣，始終呢行都係被動，何況我野心唔大，我冇所謂，有工照開，有戲就照拍，總之努力做好每一件事。不過，若然有機會，我都好希望可以出席國際影展見識吓，話晒我呢個鄉下妹都要出吓城，見吓世面，哈……

後記：演歌舞劇

與其講代表作，不如講我嘅心願，好多人都知我好鍾意跳舞，我終極夢想係演歌舞劇。每次我去英國旅行都會去睇歌舞劇，見到啲演員能歌善舞，同時又兼顧演戲，真係好犀利！我就渣得多，同人真係冇得比。歌舞劇講求team work，係live亦冇得NG，一個人錯就影響成個演出，所以執生都要快過人。我好希望有生之年有機會參演歌舞劇，做閒角都冇所謂，一次……只係一次機會就夠了。

採訪：劉慰思

攝影：黎志輝

化妝：Kamen Leung

髮型：Zap（中環XENTER）

服裝：Vivienne Westwood

場地：Amaroni's Litte Italy