子丹擺古仔上枱怕做吸金王
昨日出版的《好報》為大中華娛圈吸金鐵男年度大結算，內地紅星黃曉明神「吸」約5億元登頂！而本港則以「宇宙最強」甄子丹及型男古天樂吸金最強。昨日，子丹出席活動時謙稱「冇咁多」，更「交波」予古仔說：「古仔搵得多過我啦！」古仔則透過經理人回應，笑言不要幫他計數，怕被稅局追數。
《好報》昨日披露「宇宙最強」甄子丹去年憑每片3,000萬人民幣（約3,800萬港幣）的天價片酬，及眾多商演、代言等，年吸金約2.5億港幣，榮登港星No.1！而型男古天樂亦是「十項全能」，去年一口氣狂拍八部電影，加上他為廣告寵兒，助他年收入約2.36億元，成吸金港星第二位！
交稅會計師計數
子丹昨日在apm商場出席星皓電影《西遊記之大鬧天宮》活動時，對於年賺約2.5億謙虛回應並為緊接其後的古仔送上高帽：「我冇咁多，古仔搵得多過我啦，數字呢啲嘢唔使關注，大家關注我嘅努力就得嘞。」雖然搵錢戰鬥力驚人，平日他生活樸素，衣着都有贊助商提供，問他是否要交很多稅時，子丹說：「稅就一定要交，但唔知道要交幾多，會計師會計，總之交應該要交嘅數項啦！」
此外，子丹大談拍《西》片時每天要化妝五小時，總化妝時間幾近一千小時，十足「坐監」，他說：「要扮演無窮精力的孫悟空，我身心疲累，最好唔使再扮孫悟空。（以後怕怕？）Never say never。係我唔想拍啫，太辛苦，心力交瘁有恐怖感。（最辛苦呢套？）部部都辛苦，好攰係中間唔可以停，好似跑一百公里，最後十幾公里冇可能停。」
「唔好成日同我計」
昨晚記者致電古仔，問及子丹指他搵得更多，古仔透過經理人回應說：「邊有咁誇張，有啲電影係友情客串，唔係套套都收咁多，冇想像中咁多。」他又表示實際數目不便透露，笑言：「最好唔好成日同我計數，怕畀稅局追數！」
根據《好報》報道，去年大中華吸金男星頭三位為黃曉明、甄子丹及古天樂，其餘依次為第四位約1.75億元的謝霆鋒、第五位約1.7億元的羅志祥、同為第六位約1.6億元的吳奇隆和周杰倫、第八位約1.1億元的王力宏、第九位約1億元的陳奕迅，以及第十位約8,800萬元的庾澄慶。
採訪：影視組
文：專案組