阿徐爛玩悶走黑面神
陳奕迅（Eason）前晚與老婆徐濠縈到中環開P倒數，殊知在派對上不歡而散！阿徐在場內high爆滿場飛懶理Eason，激到老公「黑面son」提早走，但無損阿徐心情，無王管的她與鄭希怡聯手扯爛四眼肌男上衣，愈玩愈放！
剛在台灣舉行個唱的Eason，趁大除夕與老婆徐濠縈拍拖迎接「愛你一世（2014）」年，到中環夜店與好友鄭希怡（Yumiko）、黃伊汶、陳國坤和何嘉莉等狂歡，開P前阿徐更在微博晒與Eason街頭甜蜜照。
戴超險仆
一向愛玩的阿徐甫到派對即撇甩Eason黐老友玩，而Eason見難得陪老婆去派對，就算被撇亦無怨言，坐在一旁食雪茄、玩電話，點知等了又等，與兩名男友人傾偈，又與陳國坤傾足成粒鐘，再轉移目標跟黃伊汶、何嘉莉等傾多半粒鐘，阿徐依然唔願走，再坐一會的Eason開始不耐煩兼扁嘴。直至凌晨3時許，他終於忍不住找愛妻示意返家，惟被老婆拒絕，令他即時無名火起黑面嘈交，一名女友人見狀即上前勸止，後來Eason只好先行離去，心情不悅的他落樓見現場大批記者，更全程變「黑面神」，折返入大廈從另一後門走，可惜最後仍避記者不果，只好戴上黑超取車，期間他差錯腳險些仆倒，幸最後無大礙，問他為何不與太太一起離開時，他繼續黑面不作聲。
蒲到四點
阿徐見老公離開玩得更加癲喪，且孖住剛為人妻的Yumiko在舞池向四眼肌男施襲，二女狼死扯爛對方上衣，令肌男光脫脫。期後又見何嘉莉邀Yumiko飲酒，惟Yumiko示意要駕車而拒絕。眾人玩至凌晨4時，帶有醉意的阿徐終於捨得走，問她是否與Eason鬧交？她死撐說：「佢話嚟接我喎！」話口未完她卻伸手截的士，後來Yumiko示意有車接她才作罷，再問與Eason倒數有何感覺？她說：「好開心！」然後眾人登上Yumiko落地不足一個月、價值五十萬港元的座駕離開。
昨日記者致電問Eason鬧交一事，他否認說：「無鬧交！因為我好攰，嗰度又嘈，但難得同老婆出去都幾開心，係我攰走先，哈哈，就係咁簡單，（黑面？）我攰就黑黑哋！」
文：專案組
攝：追蹤組