霆鋒氹女有一手 任圍任（目及）

北京英皇集團昨晚舉行周年慶典，於北京某酒店筵開27席，集團主席楊受成率領旗下藝人謝霆鋒、惠英紅、任達華、衛詩雅、陳偉霆等現身，導演馮小剛、郭子健、胡軍等則以嘉賓身份亮相，現場星光熠熠，場面熱鬧，楊生更事前張揚慶典內設現金抽獎，一眾藝人聞言即興奮不已。

大搞《12道鋒味》

戴上黑超的霆鋒，雖然只簡單穿上黃冷衫現身，但甫到場已令大批女粉絲尖叫連連，未幾霆鋒更被眾女團團圍着，不過霆鋒表現淡定，未有失措。及後霆鋒聯同新片《救火英雄》拍檔進行抽獎，一大堆女子即蜂擁而上，並拿住手機拍攝，務求捕捉霆鋒一舉一動，對於專程北上出席晚宴，霆鋒賣口乖謂：「好開心去呢啲晚宴，其實好多年冇出席，英皇70周年香港嗰度我有去，所以呢度都要嚟。（頭先咁多粉絲驚唔驚？）最緊要佢哋開心。」

楊受成與一班《救火英雄》台前幕後大合照。

楊受成及霆鋒歡迎馮小剛（左）到場。

於晚宴中段，英皇宣布霆鋒將與內地單位合作飲食節目《12道鋒味》，屆時霆鋒將碌盡友情卡，走勻世界各地與友人分享美食，霆鋒更獲楊受成及經理人霍汶希送上一張霆鋒廚師造型海報作為鼓勵，楊受成誇口指定必追看該節目。

霆鋒、任達華及惠英紅等乘楊受成的私人飛機飛赴北京出席晚宴。	霆鋒負責抽獎，全場起哄。	成龍以錄像支持英皇晚宴。

忙於拍攝新片《警察故事2013》的成龍，雖然人冇到，但仍很有心拍了一條片段播放，貪玩的他還以「Honey」稱呼楊受成，他謂：「我同『Honey』好多年老友，佢成日帶我去夜總會同舞廳，但都好多合作拍戲，今晚我嚟唔到，就拎5萬出嚟抽獎，唔夠再加5萬，但問楊生拎啦！」

坐私人飛機斟大計

首次坐老闆私人飛機的任達華，透露有趁機程把握時間與對方談拍戲大計，其於首次執導演筒的作品《迷離夜》口碑不俗，故有興趣再次過導演癮，奈何工作排滿，最快要到後年才成事，心癢癢的他又滿腦子大計，表示已跟《救火英雄》導演郭子健建議，開拍一部警察背景電影，並以原班人馬上陣。

談到與英皇簽約兩年，任達華坦言已適應，稍後更會續約。問到老闆會否加人工？他說：「老闆會，大家合作好開心，祝公司生意愈做愈好。」此外，霆鋒表示梅艷芳逝世10周年活動未能出席，但會於心入面懷念對方。