Winkie特訓子女周身刀
歌手Winkie和饒舌歌手MastaMic擔任兒童才藝大賽嘉賓，童心未泯的兩人大讚台上縮水版李小龍及米高積遜表演夠潮夠盞鬼，令Winkie下決心要訓練未來孩子成為周身刀張張利的全能兒童！
HotCha成員黎美言（Winkie）昨日連同MastaMic（馬米）出席「第48屆工展會小大使選拔賽總決賽」擔任表演嘉賓。而一班過五關斬六將殺入決賽的小朋友在藝人面前亦毫不輸蝕，施展渾身解數，除了出「口術」朗誦故事及獻「Sing」高歌外，更有小朋友化身縮水版米高積遜（MJ）及李小龍使出十八般「舞」藝，老成表現博得台下觀眾掌聲連連，甚有明日巨星風範！
學多啲課外活動
而Winkie亦大讚小朋友表現，又稱他們走在潮流尖端：「覺得佢哋好update，用番依家最潮嘅韓文歌，好緊貼潮流。」問到會否讓將來孩子學習各樣才藝？Winkie說：「如果第時有小朋友，都會畀佢學多啲課外活動，例如唱歌跳舞，早啲畀佢哋學好啲，不過我都會睇吓小朋友鍾唔鍾意先。」
HotCha除夕合體
另外，Winkie表示首次和馬米獻唱新合唱歌，提到兩人孖住上可以到內地出騷吸金，馬米搞鬼地說：「我哋目標係唱到長城！」問到Winkie夥拍馬米出歌是否撇甩HotCha其餘兩位姊妹？她說：「唔係，我哋倒數會一齊出騷，不過呢兩年慣咗獨立表演，依家變番三個有少少唔慣，不過公司希望我哋組合同個人雙線發展。」
文：音樂組