陳靜復出唔錫身肉搏家棟
陳靜（DaDa）「復出之作」原屬意與杜汶澤合作，想不到昨日她有份參演的新片《Z風暴》率先舉行記招，搶了阿澤「頭啖湯」。DaDa不諱言稍後要變身「陳二組」，同時開拍兩部電影，她直言會珍惜機會。問到今次電影公司可有因早前的「失場事件」而壓價？DaDa即謂：「機會係冇價嘅，不過片酬合理囉。」
黃百鳴唔壓價
戲中DaDa將與林家棟有「埋身」演出，不過暫未能透露床戲的尺度，她更幽默地叫家棟「多多指教」。DaDa亦會與男主角古天樂拍攝連場飛車、炒車及追逐戲，可謂搵命博。
目前已停止服食抗抑鬱藥的DaDa，對自己的狀況信心十足，她說：「我控制到情緒，經歷過就明白人生一定有起跌。」身為電影投資者之一的黃百鳴，則對DaDa十分支持：「唔需要簽特別附帶條款，佢唔會再失場嘅。（壓佢價？）我唔做啲咁嘅嘢。」
古仔行路硬軚
古天樂昨日行起路來明顯「硬晒軚」，他大呻腰痠背痛，原來前晚拍攝一場跳閘戲，他選擇親身上陣，結果雙腳「硬着陸」。談到稍後他要拍攝連場動作場面，古仔謂：「應該都會自己做番。（玩命？）會分shot拍嘅，唔使擔心。」此外，昨日盛君、張松枝及王敏德等亦有出席記招，而盛君更以露背裝上陣，搶去DaDa不少風頭。
採訪：影視組