蘇永康劉嘉玲虎豹出籠逛名店
蘇永康與劉嘉玲前日不約而同「獸性大發」，分別化身「老虎仔」及「豹妹」出動到中環濕平，身穿虎紋大褸的康仔，當日陪女友Anita於名店睇手袋；而「豹妹」嘉玲則撇下老公梁朝偉往選購名錶，期間引來不少自由行圍觀。
近日天氣轉冷，不少人都會出動毛毛大衣保暖，向來衣着突出的蘇永康，於前日下午4時許，就化身「老虎仔」陪女友Anita及兩男友人到中環逛名店，戴住黑超、身穿灰黑色老虎紋毛毛大褸，再配黑白虎紋毛毛長褲現身。
一行四人於該處名店睇手袋，其女友挑選了幾個手袋及皮背囊出來慢慢揀，康仔則在旁給予意見，又不時拿起小手袋研究。
原本與女店員「吹水」的康仔，後來發現門外有記者拍照，他即向鏡頭微笑打招呼，之後還識做地到附近朱古力店，購買朱古力送給現場的數名記者。派完朱古力後，康仔便折返店內繼續陪女友shoppping。
自由行喪影
另一邊廂，劉嘉玲當日就以啡色豹紋毛毛外套，化身「豹妹」出巡到中環行街，同行還有一男友人。兩人先往附近選購高級銀器餐具，期間見她向職員查問，逗留約15分鐘，嘉玲扑錘購買，簽帳後便與友人離開。
記者上前問到她聖誕節去邊度玩？她表示：「冇呀，喺香港呀！」然後再往下層睇名錶，期間被不少途人認出，當中大部分是自由行，他們為睹嘉玲風采，紛紛隔着店舖玻璃用手機拍照，步出時，嘉玲邊行邊對記者講笑：「搞到我冇得shopping喇！」其後由司機接載離開。
文、攝：追蹤組