Amanda顯母愛湊無肛孤女

名模Amanda S.自開設首間餅店後，便開始減少模特兒工作，專心發展其生意。對於可做自己喜歡的事情，Amanda自覺十分幸福，所以她一有時間便會做慈善工作。近月Amanda便透過朋友認識慈善團體「醫藝盟」，從而接觸到兩歲半的孤兒Sophie。Sophie是個天生沒有肛門及尿道的小女孩，她要接受多次手術才能維持生命，現時由慈善團體安排她來港到養和醫院，接受養和醫院義工醫生的手術。稍後Sophie會先返回內地，農曆新年後會再來港讓養和義工醫生替她完成餘下手術。

籌得40萬醫療費

Amanda表示第一次接觸Sophie，得知她身體有這個先天問題，感到很難過，她說：「Sophie係內地一個孤兒，一出世身體就有問題，需要至少40萬醫療費用，雖然依家已經籌夠手術費用，但日後仍然要好多善後，同埋仲有好多其他病童同孤兒，所以我就叫身邊嘅人捐錢，就算幾百都好，幫到幾多得幾多！」Amanda說也許跟Sophie有緣分，令她自發性去照顧她，在剛過去的聖誕節，Amanda便與她一同度過，她說：「醫院只係安排做手術同正常膳食，冇人同Sophie洗衫，佢都冇零食，所以我會去幫佢洗衫，同埋我知佢鍾意食布甸，會買布甸畀佢食，都會買維他命同奶粉。」她謂由於Sophie沒肛門及尿道，故醫生在Sophie的肚開了一個作排泄的造口，Amanda憶述第一次抱Sophie時，還弄痛她：「最初唔知道，只覺得抱起佢時，佢好似有啲唔自在，後來先知醫生幫佢喺肚開咗個造口，之後就住抱佢就冇事。」Amanda大讚Sophie堅強，令人動容：「我從來冇見過佢喊，佢只會笑，就算佢覺得好痛都唔會喊，佢真係好叻！」

Sophie天生沒有肛門，所以要接受多次手術。	Amanda經慈善組織得知Sophie的個案，所以伸出援手。	Amanda 與丈夫Christian隨時準備做父母。（資料圖片）

Amanda小時候在印度居住，12歲在當地孤兒院做義工，來港居住後，又到過「母親的抉擇」幫忙，因此她有照顧小朋友的豐富經驗，她續說：「我比較鍾意幫助有關小朋友嘅慈善團體，因為我好鍾意小朋友，而且我有一定經驗，去探訪或者幫手照顧時會容易啲，同埋我覺得小朋友係最天真無邪，佢哋冇得揀嚟到呢個世界上，如有能力好應該伸出援手。」

Sophie經歷不少痛苦，但Amanda從未見過她哭。

放大圖片

隨時準備做媽咪

問已為人妻的Amanda何時會榮升媽媽？她笑說：「順其自然，諗太多會有壓力，不過我就隨時準備做媽咪，如果真係有BB，我希望生女，因為怕男仔太曳，我驚自己應付唔到，而且老公都鍾意女多啲，希望出年會有好消息。」Amanda又謂新一年希望能做更多慈善工作，幫助更多有需要的人，因為施比受更有福。

文：名人組