Ana R.南非蜜月 吊到腳震
混血名模Ana R.新婚翌日即與丈夫Brad飛往南非度蜜月，這次的旅程既甜蜜浪漫又驚險刺激，令兩人都十分難忘。首次玩空中滑索的Ana由最初驚到腳震至後來一玩愛上，她還克服恐懼拖獅子散步。兩人又在漫天星星下共進燭光晚餐，享受二人世界。
混血名模Ana R.與Brad於本月6日結婚，兩人翌日即展開蜜月之旅，在南非度過了兩個星期的愉快假期。Ana與Brad居住在建於國家野生公園內的Chitwa Chitwa，四周都有野生動物在走動，Ana說：「裏面有大笨象、鱷魚、河馬、犀牛、豹同埋獅子等等，Brad好鍾意獅子，但係我好驚，我淨係覺得啲獅子會當我係佢哋嘅美食。」
拖獅子散步
Ana續說︰「Brad知道有得帶獅子散步就即刻book咗呢個活動，我去之前要克服我對獅子嘅恐懼，嗰日我哋帶咗一隻6歲大獅子女同一隻6個月大嘅獅子仔去散步，可以拖住佢哋散步我覺得好奇妙。有一晚我哋食完晚飯返酒店，咁啱有大笨象經過，我哋要等佢哋走晒先返到房，足足等咗一個鐘。我哋去嘅時候係動物繁殖嘅季節，可以見到好多動物BB，全部都好可愛。」
歎燭光晚餐
兩人又首次玩空中滑索，Ana本來極之興奮，但當她站在離地40米高的起點準備出發時，即害怕得腳震震，Ana說：「我無諗過係咁高，驚到差啲喊咗出嚟，唔敢踏出去，Brad就好開心咁推咗我出去。一滑出去嗰刻我已經愛上咗，嗰種喺空中自由自在嘅感覺真係好美妙，感覺似喺空中飛翔咁。」這次Honeymoon除了驚險刺激，當然也有浪漫時光，兩人在滿天星下吃燭光晚餐，享受二人世界，在大自然的懷抱中感受新婚的甜蜜。
文：名人組