薛凱琪潮氣娃娃最索 鄭融粗look累事
前晚《新城勁爆頒獎禮》圓滿結束，一眾歌手為求搶鏡都絞盡腦汁悉心打扮。星級造型師郭慶彬（Ricky Kwok）坦言美感與騎呢是一線之差，力踩唔夠高的鄭融穿爛牛仔褲，將粗髀表露人前，而薛凱琪的大將之風造型獲讚展現出娃娃少女氣質。
新城頒獎禮前晚曲終人散，眾星為求成為焦點都執到自己最型同最靚，但配搭功架稍一出事，就如星級造型師Ricky的經典潮語一樣「美感都會變騎呢」！有話直說的Ricky坦言鄭融的配搭肉酸，毫不留情地說：「衰在條爛牛仔褲，佢已經身形嬌小，呢條褲款令到佢粗腿現形，如果換條黑色貼身皮褲同埋黑色ankle boots，成個感覺會更trendy。」他又指吳雨霏穿的Marc Jacobs銀色吊帶長裙配襯西裝褸夠簡單乾淨，若然梳all back貼服髮型會更fashionable，而鍾欣潼的服飾則似着到去飲。
柏豪西裝唔死板
相反Ricky大讚纖瘦的薛凱琪着衫好睇，他謂：「佢咁高咁瘦先着得好睇，髮型同妝容整體感覺襯埋一齊好有大將之風，不失佢娃娃少女氣質。」而謝安琪的「膊」出位造型亦有壓台及新鮮感，Ricky說：「又可以騷到佢白滑長腿，幾吸引！髮型同化妝都配合得幾好，雖然唔算最好，但都OK。」
至於男子組方面，Ricky讚周柏豪一身Givenchy西裝造型有潮魅感：「佢樣同身形都搭夠，係新一代嘅fashion icon。一向西裝套裝畀人感覺好死板，但佢襯得好潮氣。」他直指陳奕迅造型略為平凡，幸好戴黑超上陣，即時星味四射。Ricky又嫌梁漢文有種刻意扮潮感覺：「反而官仔骨骨更襯佢，因為太潮服飾完全唔啱佢。」
文：名人組