鄭嘉穎一腳踢走1,900萬
視帝鄭嘉穎近年在內地爆紅吸金力超強，但一分一毫賺得有血有淚，經常拍動作戲的他周身傷，頸椎曾移位、腰背及腳都有傷患，《好報》日前拍得嘉穎到慈雲山睇跌打治腳傷。據知有內地劇向嘉穎招手，因有大量動作場面，嘉穎正考慮是否接拍，若無奈推劇隨時痛失1,500萬人仔，可謂傷上加傷！
向來工作搏盡的44歲視帝鄭嘉穎，前年憑內地劇集《步步驚心》紅遍內地，搣甩乖仔形象轉型做「武將」，先後在無綫劇集《拳王》及內地劇集《葉問》打到七彩，知名度愈打愈旺，身價亦三級跳，最新內地劇價升至50萬人民幣一集，廣告價逾千萬元，今年更成功打入福布斯中國名人榜第48名，非常威水！
爆紅背後卻換來周身傷患，去年嘉穎拍《葉問》時打爆右眼險盲，眼部縫了十針，近年他又受腳傷之苦，落樓梯及踎低都有問題，早前他就為頸椎移位及腰背劇痛，特找影帝周潤發及任達華都幫襯的星級跌打師傅羅英祥診治。
當日《好報》直擊嘉穎往醫館，貴為視帝的他刻意低調跟眾街坊逼埋睇症，治療之時醫師羅濤先為他做電療，將電線搭在其右腳患處，憂心忡忡的他猛篤手機分散注意力。幾日後嘉穎往覆診，電療後醫師為他推拿捏腳時，嘉穎痛得皺眉咬唇，之後再入房接受推背療程，離開時只見他木無表情，按着右腳一拐一拐而行，看來傷勢不輕！據知其右腳十字韌帶出現撕裂情況，延診隨時變跛，難怪近日他密密到慈雲山覆診，就是想盡快治愈傷患。事實上，不少好友都戥嘉穎擔心，希望他早日治愈舊患。
企硬冇大礙
縱使周身傷，事業如日方中的嘉穎，據知有內地公司邀請他下月拍攝有大量動作戲的內地劇，惟因其腰傷腳傷不易斷尾，嘉穎正考慮是否接拍，若無奈辭演，以50萬元人民幣一集計算，推掉三十集劇集分分鐘損失1,500萬人仔（約1,920萬港元），相當可惜！昨日嘉穎回應時貫徹硬漢本色說：「多謝關心，冇事，有心！（傷患影響拍劇？）都有好多劇本睇緊，接唔接未決定，唔會因為傷而有影響，其實傷患都冇咩大礙，都拍咁多年劇，係積落嚟嘅傷，有時間係要做吓物理治療，啲骨頭耐唔耐有移位，最近趁得閒去治療吓啫，冇咩大礙嘅。」據知，嘉穎4月會為無綫拍攝一套警匪劇。
文：影視組