靚靚護夫同網友「博」火
憑《衝上雲霄II》Cool魔一角而人氣急升的張智霖（Chilam）失落視帝，老婆袁詠儀（靚靚）收到老公的打賭禮物，在微博「多謝」無綫「賜鈪」，遭網友留言批評。靚靚護夫與網友「開拖」，短短兩小時內連環反擊網友言論。
Cool魔張智霖日前於無綫萬千星輝獎禮大熱倒灶失落視帝，他於台上的「義氣仔女論」句句有骨，而他老婆袁詠儀因貼中Chilam會輸而收到老公送價值6位數的鑽石手鈪的打賭禮物，還在微博留言「多謝」無綫。有網友認為二人是輸唔起，又插爆靚靚「被害妄想」，被辣慶的靚靚為護夫即與網友開拖，短短兩小時內以一敵八向網友連環反擊，並寫上︰「你有病嗎？你是來找事嗎？」等字句。
冇話老公一定贏
昨日靚靚接受電話訪問直言這只是兩公婆打賭，叫網友不要亂諗︰「我收到好鍾意嘅禮物，好開心先忍唔住分享，唔明有啲人會無限想像。」她反擊網友指他們輸唔起︰「要搞清楚一件事，我冇話老公一定贏，我同佢打賭都賭佢一定輸，大家諗得簡單啲，唔好無限放大。」
Chilam則不知老婆與網友開拖，他接受電話訪問時說︰「我只係出席一個騷，能夠亮相咁高收視節目相當榮幸。」
阿佘撐言論自由
另外，曾跟Chilam傳緋聞的佘詩曼，昨與胡軍、馬浚偉及導演徐小明在電視城為新劇《建元風雲》宣傳，提到Chilam失落視帝，阿佘說：「個個都係好戲之人好難揀，我咁啱冇睇到Chilam攞獎，但我覺得每個人都有權利講佢嘅致謝詞。」她又透露遺失了Chilam的電話號碼而沒有恭賀。馬浚偉則說：「唔好唔開心，佢嘅角色好多觀眾鍾意已經係肯定。我咁多年都冇攞過，好角色觀眾會記得。」
文︰專案組