麟李大整蠱 阿姐舞咁好氣
譚詠麟（阿倫）和李克勤一連十三場《歐洲坊鐘錶與溥儀眼鏡聯合呈獻左麟右李十周年演唱香港有聲音》前晚在紅館畫上完美句號，阿倫媽咪以及一班圈中好友包括汪明荃（阿姐）、陳百祥（阿叻）夫婦、黃偉文（Wyman）、曾華倩等現身撐場，贊助商溥儀集團行政總裁邱子傑夫婦亦有到場睇騷。
兩人在棟篤笑環節透露阿姐曾經做過他們的棟篤笑顧問：「左麟右李十年前有個顧問，有咩笑料都要過佢嗰關，今（前）晚想喺度多謝阿姐！」台下的阿姐回答：「之後你哋冇再搵我做顧問。」鬼馬的阿倫整蠱阿姐道：「搬走咗嘛，同埋你屋企又成日畀人偷嘢。」雖然阿姐一臉無奈，但跳鄭多燕健身舞時，阿姐即起身跟住跳。
之後克勤回憶「左麟右李」成軍十年往事的歌曲唱到眼濕濕，又話會好好珍惜與阿倫開騷的每分每刻，之後兩人攬到實一實。
阿倫：家產我有分數
演唱會完結受訪時講到今次演出十三場包括日夜場，阿倫自言不覺辛苦，笑言想有子夜場，克勤謂雖然有點疲累，但體力仍然綽綽有餘。另外，談及有報道指阿倫在英國買豪宅予紅顏知己朱詠婷（Wendy），阿倫澄清：「家事唔講喇，一有演唱會就到時到候作啲嘢出嚟，作到我都唔知嘅，但今次都算好啲，可能畀我告過（咁有冇喺英國買樓？）就算買都係應該，不過冇，家產呢啲嘢我有分數。」
文：音樂組
攝：劉智源