「宇宙最強」甄子丹的兒子James前日生日，子丹因工作在身而不在港，交由太太汪詩詩負責為囝囝舉行生日派對，眾明星好友也畀面出席，楊千嬅更帶同歲多的兒子Torres現身！
前日是「宇宙最強」甄子丹的兒子James（甄濟嘉）的六歲生日，太太汪詩詩前日特別為囝囝假私人會所舉行生日派對，不過子丹卻身在北京拍戲未能出席，但愛子心切的他就在微博上載了一張肉緊抱着囝囝的相片，並祝賀James生日快樂，他又多謝所有出席兒子生日派對的賓客，十分識做。
而詩詩昨日將生日派對的照片放上微博與眾分享，來賓包括有楊千嬅與老公丁子高及兒子Torres、任賢齊與太太Tina、名模歐陽妙芝等，場面熱鬧。相中所見，只有歲多的Torres樣子精靈，影相時還懂得眼仔睩睩望實鏡頭，非常可愛。而詩詩就為James訂造了一個Lego造型及寫有James名字的蛋糕。派對完後，詩詩與一對仔女齊為家居作聖誕布置，十分忙碌。
歐陽妙芝接受電話訪問時，大讚詩詩十分細心，安排了專人即場扭氣球送給小朋友，問她送了甚麼禮物？她說︰「我送咗錢罌畀佢囝囝，送咗玩具珠寶首飾畀佢個女，因為我都係兩個小朋友嘅阿媽，所以好明小朋友感受，一個有咁多禮物，而另一個完全冇就會好唔開心。」她稱與詩詩相識十多年，對方初入行做模特兒已認識，後來大家的小朋友又就讀同一幼稚園，二人會經常交流湊仔心得。
文：名人組