小齊閃爆應節 「夫婦」浮誇出巡
被指早已秘婚的任賢齊，與「太太」Tina向來恩愛，日前小齊化身廿四孝老公到中環接太太行街，當日小齊穿上閃爆登台Look，而Tina則以紅、白配聖誕Look現身，兩人打扮同樣突出，難怪引來不少途人眼望望。
現年47歲的台灣藝人任賢齊（小齊），與女友Tina拍拖二十多年，並育有一對子女，早前更傳出兩人早年已秘密註冊結婚，雖然小齊對婚事不置可否，但卻未有否認Tina的「太太」地位。
廿四孝接行街
化身廿四孝「老公」的小齊，於日前下午3時許，單拖現身中環皇后大道中街頭等人，戴住黑超的他，雖當日以全黑打扮上陣，但其外套卻布滿閃爆的銀色圖案，跟他平時出騷的舞台服飾差不多，未幾，見其「太太」Tina乘七人車前來，不過原來Tina的打扮亦絕不遜色，穿上紅色花花冷衫配白色裙褲，有少女味之餘亦不失聖誕氣氛。
收蛋糕即甜笑
落車後，Tina取出一件蛋糕給予小齊，小齊即露出一副冧樣，並笑住放入大手袋裡，兩人十指緊扣邊行邊傾，由於「兩公婆」打扮同樣突出，沿途引來不少途人眼望望，其後雙雙進入附近一幢商業大廈。
文、攝：追蹤組