周慧敏拒曼玉好意一生留憾

周慧敏（Vivian）作為一代玉女掌門人，形象弱不禁風，她卻自爆是個男仔頭：「我絕對唔係一個Lady（淑女），唔係咁女性化，咩都快過人，包括動作，我又性急，又活潑好動，通常都係着褲，做嘢先會見到我着裙，就算我着裙，到出街嗰剎那都會換番條褲，因為我鍾意突然去打波。」讓大家感到難以置信之際，她繼續以溫軟聲音說：「我又好少着高踭鞋，我係唔識着高踭鞋嘅女人，我今日着完夜晚返去就抽筋o架啦！完全顛覆大家對我嘅形象，所以我都要學吓溫柔，我唔算溫柔型，人哋以為我好女性化，屋企會着lace衫，我唔係o架！我好童真囉，我覺得自己好似一隻貓，我不按常規，唔鍾意受束縛，同埋唔可以有一套模式規範。」

只是一個暱稱

貫徹不愛束縛的個性，Vivian從不刻意保持玉女形象，因為「玉女」之名對她來說只是一個暱稱，她說：「當然我唔介意人哋咁樣稱呼我，因為對我嚟講唔係太大影響，喺90年代初期，20幾歲開始媒體已經咁稱呼我，跟咗我咁多年，一齊並存過渡到呢個世紀，我當係上網個nickname一樣，一個咁樣嘅名影響唔到我嘅思想行為，我覺得觀眾要評價我唔會係因為一個名，佢哋係要睇我累積嘅工作態度。」

張曼玉曾主動提出為周慧敏做形象設計，可惜最後合作不成。

周慧敏自言不愛受束縛，不會按常規做事。

知道自己要乜

這位顛覆形象的玉女，心目中的時尚達人，預料之內也是一位獨特女性，她就是張曼玉（Maggie）。Vivian表示：「其實好多人都着衫靚，不過好難唔諗張曼玉，因為着衫係累積o架，唔係依家個Maggie咁簡單，由佢出道到依家咁多年，真係每一次行出嚟都同其他女性好唔同，有好鮮明嘅形象，佢知自己需要啲咩。」

跟Maggie一樣，Vivian也是一個知道自己需要甚麼的人，但年輕的時候，難免試過錯失機會，這個「遺憾」，正與Maggie有關，Vivian嘆一口氣說：「記得當年同Maggie做戲嘅時候，試過有一次我出碟，佢提出過話要做我嗰隻碟嘅形象設計，其實我心裏面好開心，但我覺得我哋請唔起佢，唔敢將呢件事同公司講，但心裏面又諗：『可能Maggie真係錫我而唔收錢呢？』但我最後都係冇把握呢個機會。」Vivian直言這是一個遺憾，所以將來再有機會見到Maggie，她可能會向對方提出：「有冇興趣幫我做造型？」

皮膚死過一次

一個合適的造型，的確能夠增添個人氣質，但皮膚的素質也相當重要，兩者缺一不可。貓咪有9條命，愛貓而自比貓咪的Vivian，其實皮膚也「死」過一次，她娓娓道來：「我係做咗artist後皮膚出現問題先的起心肝打理自己，以前用粉條化妝，嗰個年代化粉條妝再打陰影，出嚟效果好滑，但落妝唔乾淨好容易留下污迹，皮膚會有問題，當時清潔得唔好，有毛孔閉塞問題，T字位出好多豆豆，落完妝又唔識搽番啲嘢，搞到塊面成日好似發炎咁，覺得塊面有啲刺痛，開始好擔心皮膚會衰老，嗰時先20歲出頭。」皮膚問題困擾她長達兩年，結果要睇皮膚科醫生，自此她在護膚方面落足心機，由26歲開始再沒有曬過太陽，努力成果令她像吃了防腐劑一樣，樣貌20年不變，難怪深受各大護膚品牌愛戴，今年更成為Suisse Programme的全新亞洲區代言人。

穿衣恰如其分

身處在五光十色的娛樂圈，Vivian身穿的都是最新服飾，但私下的她並不是盲目追隨潮流的人，她認為穿衣是個人信心的詮釋：「着衫係要騷出優點同個性，我買衫要合眼緣，要恰如其分，唔需要誇張都可以令人眼前一亮，要有自己style，我覺得呢樣好緊要。」Vivian亦是一個喜歡設計的人，她笑說：「我一要做騷搵衫，就自自然然夜晚瞓唔到，個腦就會有好多唔同design，跟住畫低，想造出嚟睇吓點，但我又唔識造衫，只係識設計，將來有機會都想出自己設計嘅衫，但呢刻真係冇時間。」

採訪：李惠儀

攝影：劉智源

髮型：Nichol Yip

化妝：Beverly Huang

服裝：Escada