陳靜等愛謝絕黐身男
我們的女神陳靜（DaDa）回來了，最值得高興的是，她經歷過大半年的抑鬱人生後，不斷自我反思、沉澱，加上身邊家人朋友關心，眼前的DaDa從傷痛過後站起來。談到感情，單身的DaDa雖恨拍拖，但條件是希望對方不要黐身，更表明抗拒圈中人！
失控剪頭髮
人生不同階段，或多或少總經歷跌碰，有些人會堅強面對，有些人卻會沉下去。今年24歲的DaDa前路一片光明，卻因患上中度抑鬱症，突然於8月退出娛樂圈。經數個月休養後，再宣布復出，就讓她好好剖白這陣子的心底話吧！
出道三年，我一直都覺得自己好幸運，遇到好多好肯幫自己嘅人，但正因為事業嘅順利，同埋之前憑《低俗喜劇》入圍角逐女配角，嗰段時間令我突然情緒好失控。我一直冇諗過會入圍，聽到呢個消息係好感恩，但開始壓力愈來愈大，覺得唔可以退步。好多嘢諗到好緊張，變成唔識享受工作，開始個人好累，瞓覺都要食安眠藥，亦唔想出街見人，最失控一次係我宣布完退出後，自己剪咗幾吋頭髮，然後send畀朋友，依家諗番真係嚇親佢哋！
依賴安眠藥
身邊朋友一向都覺得我好獨立，唔需要人擔心我，性格都係比較強，鍾意報喜不報憂，所以呢個病突如其來，經理人就捉我去睇醫生，當時就快頒獎禮，醫生同我傾咗好耐，話可能係家族遺傳，因為家姐都試過，但已經好番。之後我食咗幾日藥，成身開始腫又唔舒服，之後就停藥，當無事發生過，但一直都瞓唔到覺，又再食番安眠藥。
奪獎非演技
頒獎禮得獎之後，我變得好敏感同消極，雖然得獎係好開心，但之後好多問號，我覺得得獎係天時地利人和，今年行內都係想捧新人，係《低》個角色創造咗畀我，唔係我演技好，連我自己都覺得未發揮出來，只係角色寫得好，而唔係我的功勞。其實我認為做得最好係《迷離夜》，真係挖咗自己個心去做。
邵音音勉勵
呢段時間，睇到好多人好關心我，電影呢行我要好多謝阿澤（杜汶澤）同音音姐（邵音音），佢哋成日提點我，亦畀好多啟發我。阿澤係一個令我明白做演員需要將心態放鬆，識得控制情緒。
而音音姐，我真係好鍾意佢，佢好錫我，佢好肯幫後輩，在公在私畀咗好多鼓勵我，當時我收埋自己，佢都有打電話留言畀我，佢話：「你唔使覆我o架，我知o架，你想覆我先覆我啦！」之後我由澳洲散心返港都有搵佢傾偈，大家傾咗好耐，佢講嘅說話唔多，但句句都好精要。而身邊好多關心我嘅人，鍥而不捨畀力量我，佢哋係令我企番起身去面對嘅人，依家有咩唔開心，我都願意講出來。
拒戀圈中人
發掘了自己的缺點，慢慢修正得以進步，是闖向成功的路，DaDa自知不完美，所以將自己的想法改變，努力做好，2014年將至，她的工作亦排得密麻麻，至於感情事，DaDa直言不是不想拍拖，只是未找到一個合心意的對象。
其實我係個無乜自信嘅人，我亦知道自己有好多缺點，出年就快到，我想努力做好工作先，拍拖隨緣啦，雖然我自己都想，但又知道唔可以勉強，哈哈！依家冇追求者呀，我都想搵個人同我分擔同傾訴，不過我想要嘅男友條件有少少奇怪，我唔鍾意太黐身，但又唔可以唔理我，要關心我，但又唔使日見夜見，圈中人就最好唔好啦。
後記:24歲大個女
看完這專訪後，有沒有想起自己24歲那年曾做甚麼？DaDa的24歲遇到很多不平凡的事，得獎、抑鬱、退出、復出……對一個人生剛開始的女生來說，這條路絕對行得不易，慶幸這些路她提早走過，以後未來的路，還是要靠自己。
文：呂曉風
攝：沈健程
場地：Shelter
服裝：izzue@i.t、tout a coup@i.t
髮型：Kenneth Ho@Beijing
化妝：Katye Fung