張智霖封帝高唱入雲
張智霖（Chilam）今年憑《衝上雲霄Ⅱ》的「Cool魔」角色而「瘋魔」全城，最近更榮登被譽為無綫台慶頒獎禮前哨戰的「馬來西亞視帝」，論今年人氣及劇集受歡迎程度皆首屈一指，入行21年的Chilam封帝呼聲高唱入雲，加上他與老婆袁詠儀打賭，他笑說：「唔攞唔掂，大家唔好令我破費。」
Chilam拍過不少受歡迎劇集，例如《十月初五的月光》、《西關大少》等，但一直與「視帝」無緣，對於今年被一致睇好，他笑說：「平常心，自己被睇好過幾次，同TVB拍劇咁多年幾乎一年一套，所以證實係冇拍劇換獎呢樣嘢。完全冇諗過Cool魔嘅角色回響咁大，拍劇係team work，嗰陣冇話要突出自己、搶戲，拍完都感覺唔到角色嘅威力，但係監製陳維冠就話實得，有啲嘢往往喺自己估唔到嘅情況就會發生，今年係入行以嚟回響最大、係大豐收嘅一年。」
準備好謝詞
Chilam被問「視帝」獎項是否來得太遲？他說：「喺娛樂圈就好似跑馬拉松，唔棄權就會有機會出現，如果真係有機會攞呢個獎，以往嘅角色都有份，呢個係累積嘅分數。」太太袁詠儀就不睇好他攞視帝，還開盤打賭，他笑說：「佢覺得遊戲規則唔同，佢有佢嘅睇法，自己都係覺得五十、五十，如果我贏咗佢話請我出街食三個月飯，唔得我就要送六位數字鑽石手鈪畀佢，所以唔攞唔掂o架，大家幫幫手唔好令我破費。」Chilam雖然覺得攞視帝機會一半半，但也會先準備好謝詞。
繼續做Cool魔
「Cool魔」人氣爆燈令Chilam今年有八位數字平安落袋，還會推出唱片、明年將舉行演唱會及《衝上雲霄》拍電影版，他說：「聽講《衝上雲霄》係原班人馬拍，Cool魔嘅故事會延續落去，希望Cool魔繼續花弗落去，作為觀眾都唔想見到Cool魔從良。」
髮型：Vic Kwan@ii hair & nail
化妝：Hetty Kwong
採訪：影視組