無綫開放頻道 吸納食腦人才
無綫近年的創作經常被批評欠缺新鮮感，為求與時並進，將於下月宣布在黃金時段開放各條頻道，包括劇集、飲食、旅遊及明珠台節目等，給有創意者提供製作內容，並以包拍形式製作，若反應良好，會與無綫長期合作。
過往無綫製作的節目、劇集等均收視不俗，不少經典劇集更掀追看熱潮及廣泛討論，不過近年卻被外間批評水準下降，如劇集內容欠缺新鮮感、不合理情節、出現穿崩鏡頭等。飲食節目亦被指過分宣傳贊助產品，惹觀眾反感而拖低收視。鑑於以上情況，無綫吸納各方意見，決定於黃金時段開放各條頻道，給有創意者提供製作內容，有關詳情將於下月公布。
須符合廣播條例
製作範圍包括劇集、飲食、旅遊節目等，甚至明珠台節目亦可，只要無綫接納內容，兼符合廣播條例，但不可涉及政治、宣揚宗教、暴力等。無綫會以包拍形式支付一切製作費，費用方面亦不設上限，製作為半小時至一小時節目，亦會在黃金時段播放。據知，無綫會先拍攝一集作試金否，若然反應理想會繼續添食，此舉除可令無綫提高節目質素水平，亦可趁機吸納人才。
身為劇集《老表，你好嘢！》編劇兼演員的王祖藍，昨日對於無綫有新計劃表現興奮，他謂：「梗係好啦！令公司節目質素提高。其實近年好多電視台都咁做，之前我喺春晚節目都係咁，好在最後我冇被人叮走。（吸納人才令你有壓力？）我個人本身遇強愈強，好似之前睇黃子華啲橋咁，都會激勵到自己做得更加好。」一向食腦的思捷建議真正製作時應找專業人士操刀：「條橋真係得先去做，我識得太多後生仔平時都係得個講字，我覺得公司最好畀idea錢，不過揀題材方面都唔可以鬆懈，質素好緊要。」
黃翠如：多啲發揮
經常拍攝旅遊節目的黃翠如表示：「梗係好！以前讀傳理系，都會覺得冇地方可以畀我哋發揮創意。依家有咁大平台，就可以畀讀創意媒體嘅同學同有潛質年輕人多個渠道發展。」
文：影視組