張家輝啜變性人 睇鹹片調理
張家輝前晚出席新片首映禮，剛巧當日是他49歲生日，電影公司特別安排他切蛋糕慶祝！家輝於片中與變性人Poyd有不少親熱戲，他坦言拍攝前掙扎了一星期，事後要睇日本AV來清晰自己的性取向！
寰宇電影《掃毒》前晚於圓方舉行首映禮，除電影公司老闆林小明、導演陳木勝及演員張家輝、林國斌、盧惠光外，其他嘉賓還有英皇電影老闆楊受成、藝人江若琳、邱淑貞、鍾鎮濤、鄭少秋、羅霖等。林小明公布電影在內地上映四日票房收近億，反應甚佳。
嚇死陳木勝
首映當晚適逢是家輝49歲正日生日，故電影公司特別安排他切蛋糕慶祝，之後他更向在戲中飾演母親的羅蘭獻吻。提到另外兩位男主角古天樂與劉青雲，因要到第二個地方宣傳而未能現身首映，家輝笑言：「我知道佢哋唔嚟，我都話唔嚟，嚇到陳木勝死。」
家輝於片中跟泰國變性人Poyd有不少親熱戲，最近泰國局勢動盪，問可有問候對方？他謂：「冇，冇嘢嘅，佢都唔係善男信女！（點解？）佢唔係周街去嘅人，應該好安全。」提到他與Poyd的激吻戲，家輝直言拍攝前掙扎了一星期：「因知道對方嘅底蘊，我尊重佢嘅界別，但人始終係感情動物，亦因尊重佢所以拍得好徹底，我心入面亦都會有衝擊，不過呢方面嘅嘢，唔想講太多，驚人哋誤會我嫌棄呢個界別。我拍完之後都有睇AV，清晰一吓自己嘅取向。」
老婆會諒解
他又稱之前與Poyd拍了一輯火辣照，事後有向太太關詠荷「請罪」：「我問佢係咪火都嚟，佢話嚟o架嘞！但我知佢會諒解，知我有分寸。」
另外，江若琳原本在《掃毒》客串演家輝女友，可惜因片長關係被迫刪剪，但她仍感激導演邀客串。而文凱玲與夏尉喻亦有到場，文凱玲稱要多謝家輝，因當年她參選港姐獲對方睇好。夏尉喻則否認跟歌手張子丰拍拖。
文：影視組