鄭家純回饋社會豐富心靈

富豪鄭裕彤長子鄭家純，人稱純官，現時為新世界發展主席，除公司業務發展外，亦積極參與慈善工作。由其家族成立的「周大福慈善基金」，捐款一億元予北京清華大學興建的「鄭裕彤醫學樓」上周落成，純官親自前往主持儀式，同時參與正式擔任法學院顧問委員會名譽副主任的儀式。基金主力發展醫療及法律研究工作，他說健康及法律體制對人的未來十分重要，他笑言沒有這方面的知識，做生意會較為耍家：「人才好緊要，所以我哋好希望培訓人才，將佢哋嘅專長發揚光大！」問他是否認為知識可以改變命運？他想了想說：「我覺得命運係注定，重點係點樣喺過程中優化、提升同改良佢（命運），呢個亦牽涉到做人嘅態度！」

退一步海闊天空

人生的體會都是由經驗去累積，這是書本以外的另一課，他說：「做人最緊要中庸，呢個係要長年累月嘅培養。中庸係唔好太過極端，同埋一個『忍』字，我教個仔都係呢兩樣嘢，如果做到呢兩樣嘢就已經好成功。（你覺得自己做到嗎？）我盡量做啦，不過同理想都仲差好遠。」他說人與人之間相處一定有不如意，退一步真的是海闊天空，他再解釋說：「出少一句聲就冇事，不過嗰時就係忍唔到。好簡單，如果你打工，上司鬧你一句，你忍唔住鬧番佢，咁就可能畀人炒魷魚冇咗份工；你做老闆同人合作有拗撬，可能合作冇咗損失好大；中庸就係過到你過到我，好似做生意咁，唔好食到人咁盡，又唔可以畀人蝦到盡，人係冇完美，年紀大就會明白。」

北京清華大學的鄭裕彤醫學樓正式落成。

鄭家純與清華大學校長陳吉寗（左）教授及清華大學醫學院常務副院長施一公教授合照。

誰是家族接班人

慈善基金亦照顧到香港民生問題，在香港貧乏區興建社區中心。早前曾到深水埗視察「劏房」情況的純官就慨嘆說：「幾十呎嘅房，唔可以想像點樣生活，小朋友讀書環境好惡劣，起咗呢啲中心，父母返工可以放心啲仔女喺嗰度溫習，解決到一部分人嘅壓力。其實呢啲工作應該係政府做，但政府做唔夠、做唔切，我哋搵到啲錢嘅，做到咪回饋社會囉，應該要做，香港貧富懸殊太犀利喇！」

鄭家純秉承父親鄭裕彤（前）的善心，樂於助人，亦將此理念授予兒子鄭志剛。	鄭家純不時探訪老人家及學生，做到「老吾老」以及「幼吾幼」。	鄭家純次子鄭志明及女兒鄭志雯。

作為公司主席，鄭家純要顧及的還有公司業務，生長在大家族裏，人人都關心誰是下一代接班人？他笑說：「我只可以講，依家係我，下一代唔知o架，睇吓邊個係人才？要睇好多嘢，本身呢個人做人處事點呢？有冇偏私？我都唔會亦唔可以偏私自己仔女，我捧到你咁高冇用o架，人哋唔服你咪一樣打交，到時董事會同家族成員自己投票，公平競爭啦！（幾時選？）哈哈哈，我退嗰時囉！」

放大圖片	鄭家純抽空參觀鄭裕彤醫學樓內的實驗室。	儀式後，鄭家純與學生作簡短交流。

後記：過到自己過到別人

貴為新世界發展揸弗人的鄭家純，真正是在一人之下，萬人之上；那「一人」是父親鄭裕彤，可能是老天爺，或許是無形的良心；正如他所言：「過到自己過到別人」，每個人心目中的尺都不同。人到底如何才算是富足？答案其實早已在心中。

捐資二億培訓人才

鄭氏家族由2002年至今捐資北京清華大學逾二億元人民幣，捐贈範疇包括有獎／助學金、法學發展、醫學研究、老師培訓，以及建教學樓、宿舍及學校設備等，純官說要提供的不僅是硬件（學校、教學樓），還要軟件（培訓人才），軟硬兼備，重點出擊，才能透徹解決真正問題所需，而並非單單捐錢了事。