周柏豪全裸任摸 益晒人妖
歌手周柏豪在活動中透露最近忙於拍電影，但卻是人生最難過的時刻，不但要於臭氣沖天的垃圾堆中全裸，更要被lady boy（人妖）摸勻全身。
周柏豪前晚出席銅鑼灣I.T的MCM × Craig & Karl pop-up store活動，透露剛從泰國拍戲返港，大呻要在當地堆填區全裸瞓身演出，苦不堪言，他說：「臭到嘔，根本唔係城市人接受得到，真係嘔到拍唔到。我瞓喺啲垃圾度，連白色蛆蟲都見埋，其實劇情講述我畀人脫光兼中槍，而啲血係糖漿做，有成千上萬烏蠅飛埋我度，見窿就捐，係我人生中最難過嘅日子。」
連股罅都搽黑
他表示足足拍了三天，每天十二小時，最慘還下着雨，每晚完工回到酒店都要全身勁消毒，更大爆右腳腳趾腫痛，懷疑是細菌感染發炎，稍後會求醫。記者笑問他的「小弟弟」豈不是會見光？他說：「有嘢遮住，但戲中我係飾演窮人，為求逼真，導演要我搽黑個身，除咗重要部位，連pat pat股罅都搽黑埋，導演問我想經理人、化妝師定髮型師幫我搽，最後為免尷尬，我搵咗個lady boy髮型師幫我搽，當然佢冇手多，好規矩。」
對於在香港還未派上台的新歌在內地外洩，柏豪表示現交由律師處理，不方便透露詳情：「依家未證實，唔可以講咁多，希望唔涉及刑事，係犯法，我都唔想公司重要文件漏失！」
文：名人組