子華爆子珊如廁百人圍

黃子華：黃 徐子珊：徐

黃：今次返無綫拍劇真係好好玩，尤其拍住徐子珊。

徐：你想講驚多過喜咋！

子珊認為港女、剩女，都是社會畀的標籤而已。

子華說喜劇技巧，是將誇張情緒由內心發出來。

黃：唔係……你係一個要求好高嘅人，最初懶係未做過喜劇咁，搞到我哋呢啲旁邊人好大壓力囉！

阮兆祥（右起）、黃子華與許紹雄三人表情搞笑。	子珊在劇中對住子華嘟晒嘴。	為了今次訪問，子華與子珊在服飾方面亦襯到絕出現。

徐：點解你掉轉晒啲嘢嚟講啫？

黃：咁我認真講，成team人真係好有壓力，如果你講到自己咁冇經驗，都要保證係work先得o架，平日做嘢只係顧自己。

徐：會唔會壓力係來自我？因為你要睇埋我啲嘢，幫我諗埋個角色應該要點做，拍之前又要鑽研、對稿，你會搵啲靈感出嚟，我點幫你睇呀，我都唔係你個level。

黃：我唔知你講咩，唔明嘅？

徐：咁認真講，你係會話我知應該點做比較好。

黃：大家係有傾，所以咪壓力大，唔關我事都要理，唔只係你，連戲入面隊Super Senior，一出嚟冇理由我講晒嘢，分啲嚟講氣氛好啲，子珊，你初時係有少少壓力，跟住你都即興得好犀利，好多對白自己爆肚添！

徐：我唔係roll機嗰時爆喎！

黃：簡直就係，開始一陣warm up後，就可以完全不停咁爆。

徐：有咩？哈哈！

黃：你唔覺啫！可能認為好自然，我都有責任改啲嘢，你係咁易都好犀利，間中仲會話至多咪NG！好嘢呀你！呢套《My盛Lady》你做港女，其實你係唔得，做剩女好唔稱職，因為根本就唔剩，呢個字意思係唔搶手，知唔知o架？

徐：我拍之前都有練習過，但唔成功囉。

西洋麻甩仔VS加細碼神童

黃：根本你就係一個鬼妹，我做research時先知港女原來有模式，講嘢方式同平日生活態度係點，記唔記得曾經點形容過你？西洋麻甩仔呀！但戲入面你就有幾場要好港女。

徐：可唔可以改過好啲嘅名呀？

黃：你平日唔做港姐時出嚟行得好型，成個hip hop、yo啲friend咁，唔知點解，你係有呢啲格。

徐：我叫西洋麻甩仔，你咪叫加細碼神童囉！因為你着啲衫係加加細碼，有場戲要我着你啲衫，好在都有鬆位！

黃：咁同神童兩個字有咩關係呢？

徐：你根本就係神級頑童，成個細路仔咁，咪睇你平時拍嘢好cool，你都有認真嘅時候，有教我點演會好啲，會討論，開始時要對住一個唔熟悉嘅前輩有啲驚，但你好主動提出意見，可能睇出我緊張同壓力大。好記得你教識我拍喜劇技巧，唔係為誇張而誇張，要內在更誇張啲情緒先表達到出嚟。

黃：為咗呢套劇我都有做功課，對港女概念？標準唔好嘅港女咪14巴睇晒囉！我都喺劇入面捱咗好幾巴，人人有份，好似你都有份。

徐：呀？我打嗰巴係你叫我打o架！

黃：今次我嘅角色唔只係研究剩女，都有講剩男，好平均，最後發覺剩男慘過剩女，希望做到冇一個好男人感覺，其實女人根本就知，但點解可以走埋一齊？我知自己會跣你一吓，但大家仲要拍拖，呢啲係現代人心態。之前落街，聽到前面個14歲女仔着住校服，大聲話呢個世界邊度會有好男人o架，係社會問題。

徐：我覺得港女又好、剩女又好，個標籤都係社會畀，呢個係一個現象，開劇前我都有詳細做research，身邊呢類朋友多到不得了，好多係自己選擇，佢哋有能力又獨立，因為了解到男人10個有9個唔靠譜，寧願唔需要，覺得自己very fine。

坦言恨嫁想有個家

徐：個個都話你係收視保證，咁今次你又有冇壓力？

黃：呢套劇過40點真係跪返屋企，知好難，成個大氣候係唔同以前，只能夠話畀大家知已經搏命，如果靠我，證明真係唔得，但保證大家睇得開心。

徐：不嬲收視靠你，我唔得。你覺得自己係咪剩男？

黃：我係剩同盛同時出現，豐盛得嚟又幾宅，宅開就宅，係時代令你留喺屋企，冇大自然世界，遲啲大自然都係虛無，冇嘢唔可以喺屋企做。

徐：我都係好少出街，只係多你少少。

黃：我成日搭港鐵，搭完打埋交都唔認得，一出聲啲人竟然話，我認得你張達明！好好笑，你一搭就實認到，所以得閒唔好去選港姐，港男冇所謂，記得之前去尖東拍外景，你入酒店借廁所，點知出嚟時就畀成100個人圍，我路邊去都得呀！

徐：咩得閒呀，我唔係得閒先去選囉！

黃：想唔搭港鐵做港姐啦！我打交唔出聲冇人認得。

徐：依家好少一個人去唔熟悉地方，雖然都宅宅地，但私下嘅我都恨嫁，想有一個美滿家庭，剩女喺當今年代唔係大問題，只係遇唔啱，唔想勉強啫！但佢哋都係開心，活得精彩，獨身主義好強嘅。

後記

徐子珊與黃子華均是潮人，連專訪時穿着的服飾也要悉心配襯一番，皆因兩人各自準備衣服，為免出現錯配情況，據知拍攝前兩人私下研究一番。挑了一套黑色大露背低胸裝束的子珊，先讓子華過目，未幾子華便決定穿黑色老西加煲呔，簡單之餘也不失隆重。拍攝當天，看見子珊一身裝扮，子華也不禁嘩嘩聲大讚伊人索爆！

採訪：影視組

攝影：司徒國榮

場地：JC Cafe & Bar

徐子珊

服裝：Leonard

化妝：Raymond Yip

髮型：Zap Tang @ Xenter