現年28歲的泰國變性人Poy挾住「最美變性人」稱號殺入香港影壇，在新片中跟古天樂、張家輝及劉青雲合作，憑美貌迷倒片中「老公」張家輝，不過Poy原來卻獨冧古天樂，上月來港跟導演陳木勝及林小明見面時，古仔亦有出席飯局，期間Poy卻遭古仔一句KO：「咦！你肥咗喎！」導致Poy整晚不敢進食，而當消息傳至內地及泰國後，兩人被指互生好感，又盛傳Poy為古仔狠飛拍拖五年的泰國男朋友。
對於被指見異思遷，Poy坦言與男友已經分手，但就否認古仔是「第三者」，還維護對方說：「佢對我好似妹妹一樣，我覺得佢冇追過我，唔好扯人哋落水，唔想破壞佢聲譽！」其實，Poy跟舊愛早在2008年開始拍拖，不時在公開場合及網上晒恩愛，Poy曾形容男友是結婚對象，計劃在30歲後才計劃婚事，可是最終也分手收場。
另外，Poy被指貌似香港女星雨僑，昨日雨僑出席活動時亦自覺跟Poy十足餅印。
文：外娛組