張智霖Cool魔發功袋百萬
【陳永峯馬來西亞直擊】「Cool魔」張智霖（Chilam）人氣無遠弗屆，昨晚重臨闊別多年的馬來西亞雲頂開演唱會，除酬勞三級跳，直逼7位數字外，更吸引過百粉絲逼爆酒店。挾超強人氣的Chilam，有望在今晚於吉隆坡舉行的《TVB馬來西亞星光薈萃頒獎典禮2013》捧走視帝，為台慶頒獎禮前哨戰先敲響勝鼓！
張智霖憑無綫劇《衝上雲霄Ⅱ》「Cool魔」一角，不只在港人氣急升，遠至馬來西亞亦一樣受歡迎，入圍角逐今晚於吉隆坡舉行《TVB馬來西亞星光薈萃頒獎典禮2013》（前名：《Astro我的最愛頒獎典禮》）「最喜愛TVB男主角」的他，昨晚率先與羅仲謙、胡定欣、陳敏之於雲頂出席《香港紅星衝上雲頂演唱會》，登台搵真銀。打頭陣出場的胡定欣險些仆倒，嚇得伊人呆了一呆，幸而dancer扶她一把。而當Chilam出場時觀眾反應熱烈，全場叫囂。陳敏之則騷腿又跳又唱；至於羅仲謙則着裙上陣，原先準備了三首歌，但fans反應熱烈，故encore時唯有重唱一曲《夏日傾情》。
怕引起混亂走秘道
Chilam雖然闊別雲頂多年，但「Cool魔」魅力令演唱會門票火速售罄，據知酬勞更三級跳，直逼7位數字。開騷前，更有過百fans到Chilam下榻酒店等候他，由於現場人數太多，酒店被擠得水洩不通，大會為免引起混亂，只好安排Chilam走秘道，大批fans知悉後失望離開。
Chilam對此表示歉意，他說：「為咗大家安全，唔想有混亂情況出現，才安排我行秘道。（酬勞三級跳？）唔係睇酬勞份上，其實我都冇計較賺幾多錢，只想親身來多謝觀眾咁鍾意《衝Ⅱ》，同佢哋見吓面，回饋佢哋嘅支持。」
跑10K挑戰劉心悠
Chilam會否先下一城，力壓吳鎮宇、黎耀祥、馬國明、陳豪，捧走馬來西亞視帝，今晚就會揭盅，但他賽前心情輕鬆，前日已到雲頂綵排，更忙裏偷閒跑步練氣，並向一位藝人公開下戰書，他說：「我喺雲頂跑咗一個鐘，7公里，成績都幾好，我明年仲會首次參加馬拉松10公里比賽，依家開始操定，我會苦練，目標係唔可以輸畀劉心悠！」
文：影視組