謝婷婷發B瘟學做雙面媽咪

謝婷婷自言很喜歡小朋友，並不斷逗玩在場的小女孩。

謝婷婷、陳豪昨日齊出席慈善活動，以幫助小朋友獲得更多資源。婷婷見到在場小朋友，即時抱起他們，她坦言喜歡小朋友：「自細已同小朋友、小動物好有緣。（成日湊小朋友？）係呀，見到小朋友就好想教晒所有嘢畀佢，女仔就教佢護膚，最重要係教佢哋分享愛同識感恩，呢方面爹哋好識教，佢唔係特登教，但佢好開朗，依家我大個睇番，知佢點解咁多人鍾意。（媽咪係嚴嗰個？）當然，媽咪要平衡番，嚴啲。」如將來有小朋友，婷婷想同時做慈母和嚴母，她說：「但傳統係女人做衰人，平衡先係最好，唔想做一個唔受歡迎嘅媽媽。」

此外，婷婷提到前天她出席好友汪圓圓和蔡加讚的結婚典禮，她坦言很感動：「佢係其中一個朋友見我喊得最多，我好欣賞佢兩個，佢哋好有腦，加讚好見得大場面，好尊重老人家，見到老婆對眼會發光。（羨慕佢？）尋日好多人話下個係我。（搶花球？）當時我偷食緊曲奇餅。（佢哋有無介紹男仔畀你？）無呀，但我有諗過第日婚禮係點。」

婷婷想盡方法氹扭計的小朋友，反而陳豪不知所措。

陳豪獲贈一件獨一無二的ＢＢ衫。

陳豪開P迎B

同場的準爸爸陳豪就即場獲贈一件獨一無二的BB衫，他透露BB已收到很多衣服，他亦已開始布置BB房。由於BB下月便出世，他坦言心情很興奮，問會否舉辦一個迎接BB的派對？他表示：「未搞，但會搞。（今年喺屋企搞聖誕Party？）如果到時生咗就未必。」另提到有報道指他的經理人自立門戶，令他簽約處兩難局面，他表示現時專注在BB的事情上，待BB出世後才公布，但直言沒有兩難情況出現，因簽約一定首選TVB。

文：名人組