瑞莎模事生非 被導演鬧走
來自烏克蘭的模特兒瑞莎，樣靚身材正，但比起外表，讓人更加深刻的是白皮膚的她竟然講得一口流利國語，她曾在台劇《惡作劇2吻》中演出，亦客串過港產片，與古天樂做對手戲。早前她加盟香港的模特兒公司，成為熊黛林師妹，有意在港大展拳腳，第一擊便是為一田百貨行泳衣騷，大騷她的34C本錢。不過，瑞莎絕非「波大冇腦」，她是碩士生，曾奪得全國體操第一名，可謂文武雙全。
女模惡鬥眼見唔少
我自6歲起就喺烏克蘭嘅體操學校練習藝術體操，仲得過全國第一名，直到16歲，就開始我嘅模特兒生涯，同好多模特兒一樣，有一日我喺街頭畀模特兒公司嘅經理人發掘，出於我對亞洲人嘅好奇，我冇留喺家鄉，而係選擇去陌生嘅韓國發展，之後我去咗好多唔同國家工作，直至去到台灣，我就決定留低，唔想再走
模特兒工作最吸引我係可以去唔同國家，結識唔同嘅人，豐富我嘅人生經驗。記得去到韓國第一個星期都係糾正我嘅駝背問題，但估唔到一星期過去，就不停接到好多工作，第一個工作係為設計師Andre Kim行騷，當時酬勞有400美元，都算唔錯。
講到做模特兒嘅難忘經歷，自己就冇親身體驗過，但見過唔少，有次行騷，休息期間有個女模特兒瞓咗，竟然畀另一個模特兒剪咗佢啲頭髮，亦有人嘅高跟鞋畀人截斷咗鞋踭。另外有一次我同公司嘅模特兒去夜店，佢畀另一個模特兒潑鏹水喺塊臉度，真係好恐怖。可能大家聽完我咁講，唔會再有人敢做模特兒，哈哈！不過呢啲都係以前嘅事，依家好少發生。
每逢節日思家
一個人離鄉別井工作，最難過係想家嘅時候唔可以返屋企見家人，因為每次去一個國家工作至少要逗留3至6個月，之後再去另一個國家，尤其過時過節見到其他人開開心心咁同屋企人過，自己就要不停工作，諗起鼻都酸。另外，我係過敏體質，有好多嘢都唔食得，所以一離開家鄉就好難適應其他國家嘅食物。至於做嘢捱罵就一定會有，印象最深有次喺台灣做騷，當時喺後台等開場，我同爸爸媽媽講長途電話，結果畀時裝騷嘅導演鬧，仲叫我執包袱返屋企，我於是執嘢走，點知有個工作人員叫我唔好走，導演只係心情唔好，不過，直到依家嗰位導演仲有經常搵我行騷。
露肉job諗過先接
我知道唔少o靚模靠露肉出位，我唔知係模特兒公司要求定係觀眾鍾意。如果要接有需要露肉嘅工作，經理人會先跟我講清楚工作嘅內容，同埋睇咗件衫先，若果真係覺得露得唔舒服，會再同客戶溝通協調睇吓可以點搭配。我唔介意人哋注意我嘅身材，因為我去睇騷，都會注意其他人嘅身材。不過我對於整容同隆胸就唔能夠接受，因為身體髮膚受諸父母，所以我會好愛惜自己嘅身體。
其實我從來冇諗過做模特兒，以前覺得模特兒好笨，但我知道如果空有靚嘅外表而唔用腦，係冇可能成為一個成功嘅模特兒，所以我從小都好努力讀書，就算入行之後，我都有繼續學業，22歲獲得碩士銜頭，喺我嘅國家唔需要去學校上堂，只要考試高分一樣可以畢業，我好感激媽咪，佢教識我好多嘢。亦好感謝家人對我嘅支持，冇佢哋嘅鼓勵同教導，今日我唔會有機會喺大家面前演出。
追求浪漫驚喜愛情
模特兒工作方面，我好滿意自己成績，依家希望可以喺電影同電視劇有更好發展。我曾經參演過台劇《惡作劇2吻》，無論導演瞿友寧、演員汪東城、林依晨同鄭元暢都好有耐性咁等我背劇本，當時我嘅國語講得好慢，NG咗好多次，拍完呢個劇之後，我開始可以講國語。當然依家我嘅國語已經進步咗好多，有時諗嘢都會用中文諗，但有啲口音都係講唔正，成日鬧出唔少笑話。喺香港我客串過一部電影，有機會同古天樂做對手戲。無論係古天樂或汪東城，佢哋都係好好嘅演員，好輕易帶對手入戲，以前我中文唔好，汪東城好有耐性咁同我對劇本，我真係好多謝佢。至於古天樂係非常有吸引力嘅男生，我好鍾意佢嘅膚色，係我喜歡嘅健康類型男生。
目前我有欣賞嘅男生，但未真正拍拖，我喜歡嘅男生要似我爸爸，非常體貼、溫柔、細心，而且愛我。我渴望浪漫又帶少少驚喜嘅愛情，因為我好容易估中對方有咩驚喜畀我，所以如果真係有一個男生可以喺我冇諗到嘅情況下，畀到一個浪漫嘅驚喜我，我會好感動。但至今我每一段戀情都係好穩定嗰種，冇係特別深刻。
口述：瑞莎
筆錄：陳嘉敏
攝影：吳文聰