子珊撩子華雙子情侶sing

黃子華、徐子珊、陳敏之、江美儀、阮兆祥及「細細粒」陳嘉佳等前晚出席劇集《My盛Lady》晚宴，慶祝首集收視平均29、最高31點，子華及子珊以情侶黑帽黑西裝打扮亮相，子珊笑言想組「雙子合唱團」趁年底登台搵銀，子華甫出現即嗌啤酒慶祝。

子華近日成為新聞人物，被指翻撻前女友，他前晚無奈地表示「好攰」，並說：「我盡量唔會回應，如果喺屋企樓下可以隨便影，不過就唔回應，同前度都係朋友式聯絡。（翻撻？）冇可能。（講到咁實？）世界上好難講到盡100%，不過暫時睇都冇呢個可能。（依家感情狀況？）私人嘢唔講啦！（之前段感情放低咗？）總之唔係事實囉！（同前度講呢件事？）唔適合去解釋，一嚟咁多年大家好理解，二嚟我出得封面都唔會話我靚仔，依家都唔知講咩！」他直言報道影響對方生活，令他感到憤怒。

冇簽約換獎

對於曾說過收視40點會跪回家，子華笑說：「想降低大家期望，你估真係好似恒生指數咁會逐步標升咩！」提到爭視帝機會，他自比熱鬥小馬「任怨任勞時運低」，相當搞笑。問到TVB有否叫他簽約換獎？子華說：「冇喎！TVB知我個性，我係好需要瞓覺嘅人，從來冇呢啲！（睇好子珊攞視后？）有提名當贏啦！」子珊則表示爭視后欠信心，首次拍喜劇有好反應已感滿足，但睇好子華稱帝：「佢話如果冇好成績就唔再演喜劇。（指收視定視帝？）佢冇講呀，可能兩樣都想要啦！」

陳嘉佳緊張

獲讚演技好的陳嘉佳謙稱全靠子華帶領，問到會否感壓力？她說：「第一日好驚，話自己係新人，不過都冇畀佢鬧。」她又透露早前跟周潤發拍電影《賭城風雲》，更由對方揸機影了合照，相當珍貴。

文：影視組