周國豐最緊要玩
周國豐（Brandon）是香港已故著名大律師周啟邦兒子，周國豐與周啟邦有很多相似的地方，他延續了父親做律師的使命，亦遺傳了父親愛玩的個性，興趣嗜好多多，詠春、泰拳、日本劍道、西洋劍擊...，玩亦是他與太太黃泳霖（Jenny）教育兩子的大方向。夫婦倆同活躍於社交界，同時繼續了父母的社交情誼，唯一沒有「遺傳」父親的，原來他自小很抗拒跟父母穿父子裝去Ball，揚言：「我會反抗。」
J：Jenny B：Brandon
周國豐和太太黃泳霖是社交界的活躍分子，但跟當年周啟邦伉儷去Ball如上班的黃金歲月，絕對無得比，周國豐自豪地說：「着情侶裝去Ball，可以話係父母發明出嚟，相信之前冇人做過。」他說父母當年由收到邀請帖開始，便會構思衣着、飾物配搭，甚至乎連進場序亦有計算過，他說父母那些年的派對，通常會在兩個月前收到邀請帖，故有足夠時間讓父母玩個夠本。會模仿周啟邦伉儷穿情侶裝出席派對嗎？
J：「唔係我哋style，除非有一個好好嘅原因，如果可以為慈善機構籌到200萬先做，哈哈！」
B：「我平時都係着西裝打呔，好傳統，父母有佢哋style，下一代有下一代style。以前佢哋去Ball，設計到好似拍電影咁，好enjoy，好開心，我同佢哋style唔同，唔想做佢哋，細個時父母成日幫我打扮，我會反抗，幾時有父母會幫青少年着衫？要着啲誇張嘅裝束，梗係唔鍾意。」
J：「依家嘅派對含蓄啲、低調啲，唔同佢哋嗰時。」
B：「以前啲社交場合，係好玩啲，父母想娛樂自己，去Ball係自己喜好。我會以父母為榮，佢哋對社交圈有好深遠嘅影響。」
藉玩紓緩壓力
周啟邦伉儷去Ball視為玩，周國豐亦鍾意玩，玩的範圍更大，他很好動，熱愛武術，喜習詠春、泰拳、日本劍道和西洋劍擊，但同時又愛靜，愛看書、看電影，有很多東西他也想知，曾經因為好想知道某品牌一款手袋的歷史，專登搜尋資料研究一番，對他來說這些都是好玩的，認為玩很重要，他藉着玩紓緩律師繁重工作的壓力，而玩亦成為他教子的大方向。
B：「依家嘅小朋友又要返學，又要上playgroup，要學呢樣學嗰樣，好攰，我相信小朋友健康成長一定要玩，小朋友係透過玩嚟學習，其實對小朋友嚟講返學當係玩，香港好多父母本身好多壓力，學校和學位又緊張，令小朋友都好緊張，人生幾十年，一出世返學，大個又要做嘢，心理會唔平衡o架！應該讀書時讀書，遊戲時遊戲。我都畀大仔學好多課外活動，目的係希望佢有更多興趣，發掘才能，畀佢試，但唔會堅持要佢一定要學到乜嘢程度或者成績，只係想佢透過唔同嘅活動發掘興趣。」
J：「小朋友有興趣係好重要，只識讀書，連自己嘅興趣都冇機會知，就唔好。特別係男仔，要發洩自己情緒，人至會定啲，學嘢自然專心啲，大仔（禮淳）玩好多運動，游水、踢波、跆拳道等。我哋分開兩種玩法，一種unstructured play，例如喺屋企樓下個魚池餵吓魚，畀佢走吓，發洩體能；另一種係structure play，從遊戲中學習，好似個仔鍾意模仿老師點名，我就同佢玩士兵同隊長遊戲，佢做隊長，我做士兵報到，用啲想像力同佢玩。」
兩子兩種性格
B：「學校教同屋企教唔同，有互補不足嘅地方，喺學校要做好學生，要學規則，喺屋企針對小朋友個性，針對性格脾氣。專家意見可以聽，但最了解小朋友嗰個始終係父母自己，每個小朋友都唔同，其實好難用一套意見方法用喺小朋友身上。禮淳凡事都好認真，做一樣嘢之前，會認清認楚，好小心，玩砌圖可以坐好耐，佢鍾意教人，好有哥哥風範；禮熙可能係第二個關係，天生有種求生本能，生得樣靚啲，畀人鍾意啲，佢見人就打招呼，見人就笑，十個有九個都鍾意同佢玩。以前年代，父母好忙，成日要應酬，見佢哋嘅時間唔多，同我哋呢代教子女好唔同，但好肯定父母係好錫我。」
J：「我都做過直升機家長（盤旋於孩子身邊，緊張關注），好似禮淳出世，食少咗奶好緊張，喊又緊張；半夜會起身偷偷地用手指篤吓佢係咪呼吸緊。」
B：「你都唔算係直升機家長，係太緊張啫！生第二個已經好relax。我有兩個仔，其實幾想多個女，因為女會返屋企，幾好。」
為善最樂
周國豐夫婦關心社會，樂善好施，周國豐年前更參加電視節目《窮富翁大作戰》，親身體驗窮的滋味；而身為兩子的父母，他們特別關心小朋友及青少年成長的問題，Jenny上月便擔任慈善機構智樂兒童協會舉辦的「智樂慈善晚會」籌款晚會委員，該會提倡透過遊戲讓兒童擁有豐盛生命，這點跟Brandon和Jenny的育兒方針可謂不謀而合，而晚會上有拍賣環節，景福珠寶贊助Aaron Basha首飾進行拍賣，為該會籌善款。