馮允謙龍小菌 好勇鬥狠
馮允謙（Jay）和龍小菌同為2012年新人，但遭遇截然不同。一個參加歌唱比賽成功跑出，泊得英皇好碼頭；另一個卻「淪落」旺角街頭，被迫蒙面演唱。縱然命運各異，但同樣熱愛音樂的兩人均沒有自滿或放棄，更「聲聲」相惜互相欣賞。談到放棄大好「錢」途而加入樂壇，一個夠勇，一個夠狠，但兩人都揚言不後悔。
記：兩位都係去年新人，其實你哋相識經過係點？
龍：第一次見你係喺新城頒獎禮，當時你問我出門係咪好快，你好羨慕我，因為我蒙住面唔使理有冇化妝。
馮：有次頒獎禮綵排完，想要瞓一陣，我心諗如果戴咗面具咪唔使化妝！好方便，你戴咗面具幾耐？
龍：戴咗年幾啦，不過我有時行行吓街見冇乜人就會除。
馮：真定假o架？有冇Fans跟住你？
諗番係個奇迹
龍：好在啲歌迷都好尊重我，唔會跟住我，屋企人都好支持我。你屋企人支唔支持你唱歌o架？你大學讀咩科？
馮：佢哋好支持我，其實我讀Marketing，佢哋想我進身金融界，但我由細到大鍾意唱歌，17、18歲開始鍾意彈結他。
龍：（大笑）你依家好大咩？
馮：我25歲啦！佢哋知我想做音樂，冇特別反對，但冇諗過我行到呢一步，佢哋原本諗住我去參加《超級巨聲》係玩吓，當還咗個心願，咁我咪去試下，點知真係出到碟。
龍：你由參加比賽到出到碟，心情有咩轉變？
馮：諗番係一個奇迹，有好多人靚過你，唱歌好聽過你，比你有才華，但未必有機會，我咁難得可以行到呢一步，真係好幸運。
龍：你入行到依家有咩困難仲未解決到？
馮：其實好多人未必知你心態，見到你可能會覺得你好完美，但呢一行有啲嘢想要，又未必一定得到。
戴住面具去笑
龍：好似冇乜人真正了解你，你會唔會覺得幾孤獨？
馮：我唔係想宣傳，但啱啱我首新歌就係講呢樣嘢。
龍：哈哈！呢啲就係叫此地無銀三百両！
馮：哈哈，唔明！不過無論咩行業，有時你唔開心都要戴住面具去笑、去做嘢。
龍：講我o架喎？
馮：唔係，你等我講埋先，我講個個都係咁，咩行業都有人唔了解你，可能佢表面上乜都得，但唔會同你交心講嘢。
記：小菌你都參加過《超級巨聲》，但最後冇入圍，你會唔會好羨慕Jay？
龍：我覺得每個人所行嘅路都唔一樣，令我哋嘅歌、講嘅嘢都唔一樣，其實係好事。即使係有困難都好啦，如果冇呢啲困難，我又點知我有嘅嘢係得來不易，就算好似Jay咁喺大公司，佢都會有自己困難，每個人就算你見到佢幾順利，佢總會有辛酸其他人唔明白。
馮：你知唔知我由加拿大特登飛返嚟參加比賽？原本我係想參加林欣彤、胡鴻鈞嗰屆，不過撞咗我行畢業禮。
辭職返港參賽
龍：之後做緊嘢專登辭職返嚟參賽？
馮：係呀，我自己一個又唔識講廣東話，返嚟參加諗住死就死啦！
龍：嘩，你好勇敢，放棄高薪厚職返嚟參賽！
記：小菌你都為咗唱歌辭咗老師份工。
龍：係呀，好多嘢你以為唔可以放棄，但有啲嘢你就算放棄咗都唔會後悔。
馮：我嗰時諗如果依家唔做，到咗40、50歲諗番點解自己唔去試下，如果我唔返香港參加《超級巨聲》我一定會後悔，依家得到嘅嘢真係諗唔到。
願望進軍紅館
Jay和龍小菌一個作曲一個作詞，一見面即「雞啄唔斷」大談音樂經，互相分享創作心得。剛好訪問場地就在「演唱會聖地」紅館旁，二人不約而同都流露出進軍紅館的願望。也許兩人在樂壇仍然幼嫩，還有不少考驗等着他們，但相信憑着兩人對音樂的堅持及義無反顧的態度，一定可以創出屬於自己的一片天。
文：音樂組
攝：司徒國榮
場地：都會海逸酒店
龍小菌服裝：bread n butter
化妝：Gigi Chu