胡楓爆謝賢 萬元電話費冧女

資深藝人胡楓（修哥）及Joe Junior昨日出席無綫節目《三個小生去旅行》記者會，但有份拍攝的謝賢（四哥）未有到場。三人中年紀最細、67歲的Joe Junior笑言每次都猜輸要瞓碌架床，修哥則大爆四哥經常致電honey：「我諗佢講咗成萬銀電話費，電話成日響唔停。」問修哥知否四哥有否趁機溝女？修哥笑謂：「邊有時間，但有時會撞到啲影迷。我哋見到啲德國女學生，可能見我哋係演員，同老四傾偈，但呢啲唔叫溝女，叫相識滿天下，佢最受歡迎。」