Robynn & Kendy音樂療傷再啟航
組合Robynn & Kendy兩年前展開樂壇「航海旅程」，卻經歷了不少風浪，Robynn媽媽突然罹癌病逝，打亂進軍樂壇的計劃；Kendy則受到千夫所指，質疑她的音樂風格。雖然風雨欲來，但兩位小女生未有退縮，反而靠音樂自我療傷，寄望他日凱旋歸來。
Robynn & Kendy新碟《Sail Away》以航海為主題，入行兩年猶如出海歷險，碰上大大小小的風浪，數到最教人難受的是，Robynn正當想進軍樂壇前，媽媽突然患癌病重，全盤計劃被打亂，最後媽媽不敵病魔，病逝北京。Robynn憶述亡母時也感慨地說：「經歷咗生活上有好多人事後，發覺生命好短，未入行前我同Kendy喺北京拍唱歌片放上網，有人以為我哋咁有錢去北京，其實係我媽咪喺北京入咗醫院。仲記得第一次喺會展開騷，當時我媽媽啱啱過身冇幾耐，對我嚟講好深刻，我知道媽媽喺天上默默畀好多正能量我。」
面對至親離開，Robynn當時需要處理好身後事才正式復工宣傳新碟，心裏感覺連累拍檔，她說：「我唔想連累Kendy，覺得好矛盾，唔好意思拖住晒所有人，所以將時間分配得最好。」而Kendy亦曾經歷一段迷惘期，在音樂路上每走一步，都有人對她指指點點，好不難受，她說：「由我哋放片上網到入唱片公司，好多人反對我入唱片公司，又話我哋轉咗風格，有好多人提出唔同意見，最後索性唔理，當佢哋唱歌。」
比堅尼益粉絲
她們各自將自己最痛的經歷化成音符，寫成《Gonna Be Okay》，勉勵大家的同時亦為自己打氣。問到以航海為題，可會着上三點式配合宣傳？她們笑言會穿上「蠱惑比堅尼」益粉絲：「冇人肯睇o架，我哋未夠班，不過可以揸條絲巾喺船頭吹海風，或者着件印咗比堅尼圖案嘅Oversize Tee。」
髮型：Eve@Queen's Private i Salon
化妝：Kirsty Lam
場地：Green Orange
文：音樂組