Elke北上掘金險被劫
早前因女星蔡少芬在內地被「賣豬仔」一事，令有意北上「掘金」的藝人人心惶惶，而o靚模冬甩成員陳芷敏（Elke）日前亦自爆曾在內地被狂敲車門，示意要她畀錢，故她急急提醒師妹鄭安那（Biona）和潘欣妮（Loretta）要小心！
「人仔」唔易賺，早前蔡少芬到內地做商演時被「賣豬仔」，搞到有意北上「掘金」的藝人人心惶惶，入行三年多、算是半個師姐的Elke，近年亦忙爆在內地工作，她見日前有空檔，即約埋師妹出來，提醒師妹Biona和Loretta倘若搵「人仔」要小心。
Elke自爆經歷：「其實最初返內地都幾危險o架，因為有次上去一間酒吧停車，突然之間有人狂敲我哋車門，睇睇吓原來想示意我哋畀錢佢，真係個心都嚇到離一離，唔知點算好！好彩最後車上嘅同事，提我千祈唔好開車門，之後佢就同嗰個人講：『我哋冇錢o架！』之後即刻開車走！又試過啲粉絲太熱情，捉實我雙手唔放，差啲扯我落台，搞到我瘀晒，等咗成個星期先去瘀！」
保安築人牆
而有數次內地登台經驗的Biona，亦大嘆危機避無可避：「其實去親表演，啲人都會好熱情，如果佢哋撲埋嚟，真係避都避唔倒，惟有靠保安手拖手築人牆，咁就會放心好多！」聽完二人教路後，未試過返內地的Loretta表示：「下個月會第一次上去做騷，雖然驚驚哋，但始終都試吓，自己會小心！」
文：專案組
攝：吳文聰