雨僑自家化妝掃上架 微服巡舖
雨僑年前在網上教化妝後，自知女人錢最易賺，故最近跟友人投資了6位數字推出自家化妝掃從商，日前她親到超市的貨架執貨時，擒高踎低頗操勞，揚言不靠男人的她定下十年計劃，望由「美容達人」升呢為上市公司主席。
雨僑在新片中和韓星李世慜溫泉「浴」搏，其性感演出令人咋舌，但日前她又回復斯文OL打扮，現身尖沙咀海港城的美容部，見她在買化妝掃的櫃位仔細研究，期間更擒高踎低揀得投入，當發現傳媒時，她笑住報料：「我嚟巡視業務o架，我自己推出嘅化妝掃品牌終於上架啦。」
望十年內上市
問她化妝掃生意投資多少？雨僑透露：「之前只喺網上賣，但想開拓客路，所以同朋友夾份掟咗20幾萬出嚟喺街賣，做咗一排，反應都好好，依家諗住喺唔同嘅地方租多幾個位賣，全力將我嘅化妝掃發揚光大。」
雨僑自言看見擁有自己的品牌櫃位，那份喜悅非筆墨可形容，未婚的她更謂：「好似睇到自己佗咗九個月BB出世一樣咁興奮。」她又說經常會微服巡「舖」，每逢聽到顧客的好評就滿心歡喜，問她營商的終極目標？雨僑坦言：「上到市囉，我諗起碼十年，希望我退休前可以做到啦。」
羅力威冇支持
問雨僑其緋聞男友羅力威可有金錢支持？她謂：「冇呀，佢連鼓勵都冇，因為佢都唔識化妝，不過我都會送一套化妝掃畀佢化妝師，希望將來有機會推出男士美容用品。」雨僑近期忙拍戲外，又要登台及籌備新歌，問她可有時間約會羅力威？她笑住說：「咁幾忙，都會同朋友食飯嘅。」
文：音樂組