黎瑞恩嫌幼稚唔like經典曲
將舉行慈善演唱會的歌手黎瑞恩，闊別娛樂圈十一年，日前獲邀接受《東網》娛樂onShow訪問，自爆唔like經典金曲《一人有一個夢想》，覺得幼稚太可愛，歌曲爆紅全屬意料之外。
闊別娛樂圈十一年的黎瑞恩，日前接受《東網》娛樂onShow主持人廖嘉輝（Look）訪問，透露將舉行慈善演唱會，為聾啞小朋友籌款。
由於黎瑞恩對演唱會的表演作品相當口密，所以Look惟有將其經典金曲逐首估，估到曾唱到街知巷聞的《一人有一個夢想》時，黎瑞恩竟然自爆最初唔like這首歌：「當我錄嘅時候係唔鍾意，因為歌詞有一、二、三好似好幼稚，之前想擺脫好Cute嘅感覺，嗰陣已經廿一、二歲，覺得好奇怪，就諗可唔可以畀啲成熟啲嘅歌我唱呀，仲畀啲咁嘅嘢我唱，點知最後呢隻歌爆出嚟，所以要多謝監製。」
不是「怪獸家長」
另外，談到曾透露沒有向小朋友提及自己曾是歌手一事，黎瑞恩認為原因是不應該緬懷過去：「我從來都唔會透露自己嘅身份，有啲過咗去就係過咗去，唔好成日提住，如果你成日提住，即係代表緬懷，成日諗番去後面，其實諗番前面會唔會好啲？」對於對小朋友的期望，她不認為自己是「怪獸家長」，稱一切按部就班：「我就要佢哋中文一定要讀番好，因為佢哋讀國際學校，中文一定差啲，但一定要讀大學，因為你要有知識先得，但我從來冇逼佢哋考咩學校，總之健健康康，慢慢讀上去。」
場地：馬可孛羅酒店 @Cafe Marco
髮型：Steve Shek @hair
化妝：Meegan seak @bridal corner
文：專案組