陳靜置裝開工 焗住捱鬧
陳靜（DaDa）「閃退」娛樂圈三個月火速「復出」，修身成功的她昨日狀態大勇現身銅鑼灣，為後日頭炮復出工作準備，對於被錢國偉連番指摘失誠信，DaDa直言：「把口喺人哋度，我哋淨係可以做好自己工作。」
DaDa自今年8月宣布退出娛樂圈後，一度自我放棄，令到身形暴脹走樣，反思後決定繼續演藝事業的她，開始重拾動力，積極修身。昨日下午4時許身穿針織衫襯長裙，在助手陪同下現身銅鑼灣，明顯減磅成功，期間她和助手有傾有講，心情亦相當不錯。
冇致電彭浩翔
據知，DaDa「閃退」後復出頭炮工作將會於後日夥拍無綫小生黃宗澤，為商場聖誕亮燈擔任嘉賓，而在19日則會出席時裝品牌活動。為迎接一連串公開活動，昨日她正式開始試新裝。大約5時，DaDa和助手結伴離開時裝店，發現記者後她禮貌地打招呼，及至被問到錢國偉不滿她致電彭浩翔而沒有打給他，有大細超之嫌，DaDa說：「唔係！當日係有記者問我有冇聯絡圈中人，我話彭浩翔生日我有send message，其實我都冇打過畀佢，佢（錢國偉）誤會咗嘞！」
至於再問到不斷被指摘失誠信，她說：「把口喺人哋度，要畀人鬧我都冇辦法，惟有做好啲自己嘅工作。」
錢國偉唔甘心
錢國偉前晚出席活動，大呻未收到DaDa的道歉電話，但對方卻有向彭浩翔講生日快樂，他說：「彭浩翔得一個，我成績又唔及人，但我覺得係經理人問題。」問到會否禁用施念慈旗下藝人，他說：「世界係圓，最緊要『誠信』兩個字！」他又透露事件已交由律師處理，但卻心有不甘地說：「點解（DaDa）道咗歉，認咗錯，仲要好似畀人蝦咁？」
文、攝：追蹤組