艾力被爆股有傷痕 扯火湧淚

美國男星艾力寶雲（Alec Baldwin）前日與老婆Hilaria齊齊現身紐約法庭，為加拿大狂迷Genevieve跟蹤及騷擾一案作供，被控多達24項罪名的女主角Genevieve遲了十分鐘現身，仍氣定神閒受訪：「我無罪，我唔係狂迷，我無做錯任何事。」於審訊期間，艾力聲稱從未跟Genevieve發生性行為，當初僅由《疤面煞星》監製好友Martin Bregman於02年介紹認識，而指其實二人有染。Genevieve聽到即怒火中燒，在庭上指着臀部咆哮：「你講大話！你呢度有傷痕！我有證據可以證明我地曾發生性關係！我無做錯任何嘢！」於是被法官警告藐視法庭，而坐在證人欄的艾力亦「怒啤」Genevieve「回禮」。

破壞訂婚

此外，艾力又指Genevieve幾乎每晚留多達30個電話留言，及幾百封電子郵件，表示望能夠與他結婚，生下「小寶雲」。艾力指與Hilaria訂婚當天：「我發現Genevieve就在屋外，我即刻跑去叫老婆不要走近大門，因我不肯定她手上有沒有槍或武器，於是我打電話報警，從那一刻開始，我便知她是危險人物。」回想訂婚被破壞，堂堂大男人亦不禁落淚，Genevieve則揶揄：「佢有咩好喊？」

好友直斥

除艾力外，太太Hilaria亦有出庭作供，Genevieve依然唔收火：「我從無同你講過嘢，你會落地獄！你講大話！」不過，Hilaria就指艾力曾將Genevieve打來的電話交給她：「她不停在電話內罵我八婆，我有跟她說這並不恰當。Genevieve又寄信警告我不要出席公開活動，我真係好怕佢。」審訊完畢後，剛喊完的艾力面對記者時依舊火爆，還出言：「我希望你會骾死。」同日，艾力好友Martin接受傳媒訪問時，直斥艾力講大話：「他現在同時搞砸兩個女人的人生。」對於艾力指Martin與Genevieve有染，他即回應：「我87歲了，真的受寵若驚。」

文：外娛組