魔童醒目 抆衫尾避鏡頭
張智霖（Chilam）和袁詠儀愛兒張慕童（魔童）前日7歲生日，一家三口出動去中環食日本菜慶祝，離開時遇上記者，壽星仔魔童鬼馬地抆爸爸衫尾，再匿在媽媽身後，成功避過被攝入鏡。
寶貝仔7歲生日，Chilam和靚靚這日專登調動工作，安排了家庭日陪囝囝度過，靚靚並於微博上載一家三口食飯慶祝的照片，公開祝賀囝囝生辰快樂，兩人不少粉絲紛紛隔空向魔童送上祝福。
雖然沒有浮誇生日會，魔童有父母陪伴亦相當滿足，一家人開開心心歡聚一晚兼食日本餐，為了不打擾囝囝的作息時間，影響翌日上課，Chilam和靚靚更刻意安排一早入座，這餐生日飯至晚上8時多便吃完，三人食飽飽離開餐廳，準備回家休息。
對鏡頭敏感
魔童拖實爸爸媽媽，紮紮跳地步出，向來個性鬼馬的他，第一個發現記者拍攝，比做明星的父母對鏡頭更敏感，只見他第一時間抆實爸爸衫尾繼而再擰轉面，靚靚見囝囝不欲上鏡，愛兒心切的她，急急地出手護住囝囝的面部，以身軀為子擋鏡頭，然後禮貌地對記者微笑。躲在媽媽身後的魔童急步而行，走在前面的Chilam見狀馬上掏出車匙，開定車門讓靚靚兩母子上車，自己則任司機，一家人齊齊打道回府。
文、攝：追蹤組