賭王何鴻燊四太梁安琪昨晚出席活動，被問本月25日是何生生日是否又送「肉嘴」？她說︰「例牌，幾十年啦，已book咗餐廳同佢慶祝，食中菜，但要視乎佢身體情況。」繼又透露在外國讀書的仔女均表示會回港與何生慶祝生日。
另外被問到大女何超盈是否拍拖？四太說：「我唔清楚，你哋仲清楚，依家都冇秘密，你哋講畀我聽仲好，感情方面我唔係好問，佢鍾意講就講，佢冇同我講，我都唔知係咪，可能成熟咗先講。（想唔想佢哋成家立室？）細路仔大咗，都想佢哋成家立室，人之常情。」
